Misirdə Bahar bayramı ərəfəsində bütün park və çimərliklər bağlanıb
Qahirə, 1 may, AZƏRTAC
Misirin 27 vilayətinin qubernatorları, o cümlədən paytaxt Qahirənin rəhbərliyi mayın 3-də keçiriləcək Şam Əl-Nəssim bahar bayramı və ortodoks xristianların Pasxa günü ərəfəsində COVID-19 infeksiyasının daha çox yayılmasının qarşısını almaq məqsədilə təlimatlar yayıblar.
AZƏRTAC xəbər verir ki, təlimatda bütün vilayət və şəhərlərdə parkların, habelə çimərliklərin bağlanması tapşırılıb. Ənənəyə görə, Şam Əl-Nəssim günü parklarda və dəniz sahillərində istirahət edən əhaliyə mayın 3-də evlərində qalmaq tövsiyə olunub.
Son günlər Misirdə COVID-19-a yoluxanların sayı xeyli artıb. Hər gün 60-a yaxın ölüm faktı qeydə alınan ölkədə pandemiyanın üçüncü dalğasının başlayacağı ehtimalı var. Misirin səhiyyə naziri Halə Zayid bunun əsas səbəbinin Ramazan ayında əhalinin bir yerə toplaşması olduğunu deyib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
