Misirdə COVID-19-a yoluxanların sayı yenidən artır
Qahirə, 27 avqust, AZƏRTAC
Son sutka ərzində Misirdə COVID-19-a yoluxanların sayı ötən günlə müqayisədə iki dəfədən çox artıb. AZƏRTAC Misir Səhiyyə Nazirliyinə istinadla xəbər verir ki, avqustun 26-da ölkədə 206 nəfər yeni növ koronavirusa yoluxub, 19 pasiyent isə həyatını itirib.
Nazirliyin məlumatında qeyd olunub ki, indiyədək Misirdə COVID-19-a 98 minə yaxın insan yoluxub, 5317 nəfər isə vəfat edib. Hökumətin karantin rejimini yumşaltması, məscidlərin ibadət üçün açılması pandemiya şəraitinə mənfi təsir göstərib. Səhiyyə Nazirliyi yaxın vaxtlarda yoluxma hallarının daha da artacağını proqnozlaşdırır. Belə olan təqdirdə yenidən sərtləşdirilmiş tədbirlərin tətbiq ediləcəyi ehtimal edilir. Artıq Misir hökuməti ölkəyə gələnlərin hamısından COVID-19 testi arayışı tələb etməyə başlayıb.
Nazirlər Kabinetinin son iclasında çıxış edən Baş Nazir Mustafa Mədbuli bildirib ki, pandemiyaya qarşı qoyulmuş qaydaları pozanlar cəzalandırılacaq. O əlavə edib ki, iaşə obyektlərinin, parkların və muzeylərin, habelə digər qapalı məkanların açılması yeni növ koronavirusun sürətlə yayılmasına səbəb olub.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
