Molekulyar Biologiya İnstitutunda Milli Qurtuluş Günü qeyd olunub
Bakı, 12 iyun AZƏRTAC
Elm və Təhsil Nazirliyinin Molekulyar Biologiya İnstitutunda 15 İyun - Milli Qurtuluş Gününə həsr olunmuş tədbir keçirilib.
İnstitutdan AZƏRTAC-a bildirilib ki, əvvəlcə Azərbaycan Respublikasının Dövlət Himni səsləndirilib, Milli Qurtuluş Gününə həsr olunmuş videomaterial nümayiş etdirilib.
Tədbirdə çıxış edən institutun elmi katibi biologiya üzrə fəlsəfə doktoru, dosent Durna Əliyeva 15 İyun-Milli Qurtuluş Gününün Azərbaycanın müasir dövlətçilik tarixində mühüm siyasi və tarixi əhəmiyyət daşıdığını vurğulayıb. O, Ümummilli Lider Heydər Əliyevin Azərbaycan xalqı və dövləti qarşısındakı müstəsna xidmətlərindən danışaraq bildirib ki, 1993-cü ildə ölkədə hökm sürən mürəkkəb ictimai-siyasi vəziyyət, iqtisadi böhran, xaos və anarxiya fonunda dövlət müstəqilliyi ciddi təhlükə ilə üz-üzə qalmışdı. Həmin dövrdə xalq ölkənin xilası üçün yeganə çıxış yolunu Heydər Əliyevin hakimiyyətə qayıdışında görürdü. 1993-cü il iyunun 9-da Ulu Öndər Heydər Əliyev xalqın çağırışına səs verərək Naxçıvandan Bakıya gəldi. Ümummilli Liderin Azərbaycanda yenidən hakimiyyətə qayıdışı ilə ölkədə ictimai-siyasi sabitlik bərpa edildi, qeyri-qanuni silahlı dəstələr zərərsizləşdirildi, dövlətçiliyimiz məhv olmaq təhlükəsindən qurtuldu, hüquqi və demokratik dövlət quruculuğunun əsasları formalaşdırıldı. D.Əliyeva qeyd edib ki, Heydər Əliyevin siyasi müdrikliyi, zəngin dövlətçilik təcrübəsi, qətiyyətli və yorulmaz fəaliyyəti nəticəsində Azərbaycanın gələcək inkişaf strategiyası müəyyənləşdirildi, bu istiqamətdə ilk mühüm addımlar atıldı və sosial-iqtisadi dirçəlişə yol açan islahatlara başlanıldı.
Tədbirdə AMEA-nın müxbir üzvləri İbrahim Əzizov və Novruz Quliyev, biologiya üzrə fəlsəfə doktoru Vəfa Həsənova, elmi işçilər Sevda Mahmudova və Günay İsmayılova çıxış edərək Ümummilli Lider Heydər Əliyevin xilaskarlıq missiyasından, dövlətçilik tariximizdəki müstəsna rolundan və ölkənin inkişafı naminə həyata keçirdiyi siyasətdən bəhs ediblər. Çıxışlarda vurğulanıb ki, 15 İyun - Milli Qurtuluş Günü Azərbaycan dövlətçilik tarixinin ən əlamətdar səhifələrindən biridir. Xalqın təkidli tələbi ilə hakimiyyətə qayıdan Heydər Əliyev ölkəni parçalanmaq, müstəqilliyini itirmək və vətəndaş qarşıdurması təhlükəsindən xilas edib. Natiqlər qeyd ediblər ki, Milli Qurtuluş Günü Azərbaycanın tarixində dönüş nöqtəsi olmaqla yanaşı, müstəqil dövlət quruculuğu yolunda yeni mərhələnin başlanğıcıdır. Vurğulanıb ki, Ümummilli Liderin müəyyənləşdirdiyi siyasi kurs bu gün Prezident İlham Əliyev tərəfindən uğurla davam etdirilir və Azərbaycan hərtərəfli inkişaf yolunda inamla irəliləyir.
Bölmənin digər xəbərləri
