MƏDƏNİYYƏT
MOSKVADA AZƏRBAYCAN RƏSSAMININ SƏRGİSİ AÇILMIŞDIR
Moskvada, Mərkəzi Rəssamlar Evində Azərbaycan rəssamı, Rusiya rəssamlar və kinematoqrafçılar ittifaqlarının üzvü Əsgər Məmmədovun əsərlərindən ibarət sərgi açılmışdır. Respublika Gününə həsr olunmuş sərgi Rusiyadakı Azərbaycanlıların Federal Milli-Mədəni Muxtariyyətinin köməyi, habelə Rf Mədəniyyət Nazirliyinin və Mərkəzi Rəssamlar Evi rəhbərliyinin dəstəyi ilə təşkil olunmuşdur.
Azərbaycanın Rusiyadakı səfirliyinin nümayəndələri, Moskvadakı Azərbaycan məktəbinin şagirdləri, Rusiya paytaxtındakı müxtəlif milli icmaların nümayəndələri, habelə Əsgər Məmmədovun yaradıcılığının pərəstişkarları onu təbrik etməyə gəlmişdilər.
Azərbaycanın Rusiyadakı səfirliyinin ikinci katibi Tamilla Əhmədova açılış mərasimində çıxış edərək bildirdi ki, Azərbaycan rəssamının Moskvada sərgisinin keçirilməsi, tarixən bir-biri ilə sıx bağlı olan iki xalq arasında dostluq münasibətlərinin və qarşılıqlı anlaşmanın dinamik inkişafını, mədəniyyətlərin qaynayıb-qarışmasını bir daha sübut edən əlamətdar hadisədir.
Rəssamın “Bakı motivləri”, “Qarabağ xatirələri”, “Qədim çinarın kölgəsində” əsərləri həmvətənlərimizə doğma diyarın mənzərələrindən zövq almaq, onun hərarətini hiss etmək, Azərbaycan torpağının nemətlərinin ətrini duymaq imkanı vermişdir.
Əsgər Məmmədovu təkcə Azərbaycan milli motivləri cəlb etmir. Rəssam Rusiya mənzərələrinə də müraciət edir. Rusiyanın şimal diyarlarının təbiətinə həsr olunmuş “Valaam adaları”, “Neva sahilində” və digər əsərlər bunu sübut edir.
Sərgi mayın 28-dək davam edəcəkdir.
Asya Hacızadə
AZƏRTAC-ın xüsusi müxbiri
Moskva