MOSKVADA EKSTREMİST YÖNÜMLÜ CİNAYƏTLƏRİN SAYI ARTMIŞDIR
AZƏRTAC-ın xüsusi müxbiri xəbər verir ki, ötən ilin birinci yarısı ilə müqayisədə 2008-ci ildə Moskvada ekstremist yönümlü cinayətlərin sayı altı dəfə artmışdır.
Bunu RF Prokurorluğu yanında İstintaq Komitəsinin sədri Aleksandr Bastrıkin bildirmişdir. Onun sözlərinə görə, ilin birinci yarısında bütövlükdə Rusiya üzrə belə cinayətlərin sayı 67 faiz (150-dən 250-dək), Mərkəzi Federal Dairədə isə 165 faiz (37-dən 98-dək) artmışdır.
Rusiyada cinayətlərin ümumi sayının 9 faiz azalmasına baxmayaraq, ekstremistlərin törətdikləri cinayətlərin sayının ilbəil artmasından narahatlığını vurğulayan A.Bastrıkin bildirmişdir ki, məhkəmədə 2006-cı ilin avqustundan 2007-ci ilin aprelinədək ekstremizm zəminində 25 basqın və digər ağır cinayətlər törətmiş bir qrup skinxed barəsində cinayət işinə baxılır. O demişdir: “Dəhşətli haldır ki, qətl hadisələrinin əksəriyyətini şüuru millətçi təbliğatla zəhərlənmiş yetkinlik yaşına çatmayanlar törətmişlər”.
Prokurorluğun İstintaq Komitəsinin Moskva üzrə İstintaq İdarəsinin rəhbəri Anatoli Baqmet isə bildirmişdir ki, iki ekstremist qrup barədə cinayət işləri araşdırılır. Bu qruplardan biri milli zəmində 12 qətl hadisəsi törətməkdə təqsirləndirilir. İlin birinci yarısında Moskvada 600-dən çox adam zorakılıqla qətlə yetirilmiş, yaxud bu səbəbdən həlak olmuşdur.
Bölmənin digər xəbərləri
