MƏDƏNİYYƏT
MUSİQİLİ KOMEDİYA TEATRI MÖVSÜMƏ BAŞLAYIR
Sentyabrın 7-də Azərbaycan Dövlət Musiqili Komediya Teatrı 92-ci mövsümü açır. AZƏRTAC-a bunu teatrın müdiriyyətindən bildirmişlər.
Qarşıdakı mövsümdə teatr həvəskarları artıq sevdikləri “Hərənin öz ulduzu”, “Qızıl toy”, “Bankir adaxlı” musiqili komediyaları ilə yanaşı, yeni tamaşalara da baxa biləcəklər.
Mövsümün açılış günü teatrın Azərbaycan bölməsi “Gülmək qadağandır” yumorlu konsert proqramı ilə çıxış edəcək, rus bölməsi isə sonra, sentyabrın 13-də “Dünyada qadınlarsız yaşamaq olmaz” tamaşasını göstərəcəkdir.
Hazırda teatrın yaradıcı kollektivi “Məsmə xala dayımdır” komediyası üzərində işi başa çatdırmaqdadır. Onun ilk tamaşası sentyabrın 21-də olacaqdır. Teatrın planlarında Molyerin Akif Əli tərəfindən tərcümə edilmiş “Meşşan dvoryanlıqda” adlı məşhur pyesi üzrə tamaşa da nəzərdə tutulur. Tamaşaya musiqini mərhum bəstəkarımız Emin Sabitoğlu yazmışdır.
İndiki teatr mövsümünü tam əsasla yubileylər mövsümü adlandırmaq olar. Teatrın müdiriyyəti iki görkəmli Azərbaycan bəstəkarına həsr edilmiş xatirə gecələri keçirməyi nəzərdə tutmuşdur. Rauf Hacıyevin xatirə gecəsində “Qonşular”, Qara Qarayevin xatirə gecəsində isə “Əsl qaskoniyalı” tamaşaları göstəriləcəkdir.
Teatrın direktoru, xalq artisti Hacıbaba Bağırov demişdir ki, Azərbaycan Mədəniyyət və İncəsənət Universitetinin aktyorluq fakültəsində oxuyan və böyük ümidlər verən istedadlı gənclər də cari mövsümdə tamaşalara cəlb olunacaqlar.