Mütəxəssis-ekspert: Təkcə düzgün qidalanmaqla immun sistemini gücləndirmək mümkün deyil
Bakı, 16 mart, AZƏRTAC
Fəsil dəyişkənlikləri ilə əlaqədar bir çox xəstəliklər kəskinləşmə mərhələsindədir. Onlar daha çox yuxarı tənəffüs yolu sistemi xəstəlikləridir - allergik rinit, astma, yuxarı tənəffüs yolu infeksiyası və s. Bəzi mədə-bağırsaq sistemi xəstəliklərinin də, xüsusilə qastritin yaz aylarında kəsinləşdiyini görürük. Mütləq şəkildə bu dönəmlərdə bir çox proseslər olur ki, vətəndaşlar onlara diqqət etməlidirlər. Mədə-bağırsaq xəstəliklərində gizli gedən simptomlar aşkarlanır, ya da ki, heç bir simptomu olmayanlarda yeni əlamətin üzə çıxmasına şahid oluruq.
AZƏRTAC xəbər verir ki, bu barədə Səhiyyə Nazirliyinin mütəxəssis-eksperti, həkim-terapevt Zakir Quliyev nazirliyin instaqram hesabındakı canlı yayımda deyib.
Z.Quliyev immuniteti gücləndirmə üsullarından bəhs edərək qeyd edib: “İmmuniteti hansı qidaların gücləndirməsindən ziyadə hər zaman balanslı qidalanmaq daha yaxşıdır. Təkcə düzgün qidalanmaqla immun sistemim güclü olacaq demək mümkün deyil. Burada bir çox faktor var ki, onların hamısı birlikdə dəyərləndirilməlidir. Yuxu rejiminə əməl edilməli, bol miqdarda maye qəbul edilməli - burada bəzi xəstəliklər var ki, xüsusilə ürək-damar sistemi xəstəliklərində çox maye qəbul etmək zərər ola bilər - balanslı qidalanmalı, hər şeyi öz mövsümündə yeməli, xüsusən də bir qidaya daha çox üstünlük verilib, digər qidaların qəbulu azaldılmamalıdır. Meyvə-tərəvəzlərdən mövsümünə uyğun olaraq maksimum dərəcədə istifadə olunmalıdır. Həftədə bir dəfə balıq əti yeyilməsi mütləqdir, hazır yağlarda qızardılmış, hisə verilmiş qidalardan maksimum dərəcədə uzaq durulması məqsədəuyğundur. Qidaların bol su ilə qaynadıb bişirdikdən sonra qəbul edilməsi tövsiyə olunur.
Bədəndəki hər hansı bir mineral və ya vitamin çatışmazlığını dərman vasitələri ilə bərpa etmək məqsədəuyğundur. Lakin bunu hər hansı analiz və həkim məsləhəti olmadan özbaşına qəbul edərkən onun faydadan çox zərər verəcəyini unutmamaq lazımdır. Ona görə də pasiyent immun sistemində hər hansı bir problem olduğunu düşünürsə, həkimə müraciət etməli, gərəkli analizləri verməli və əskik olan hormon, vitamin və mikroelementin bərpası istiqamətində mütəxəssisin tövsiyə etdiyi dərmanları qəbul etməlidir. Bəzən özbaşına alınan dərman bizə faydadan çox zərər verə bilər. Bunu təcrübədə görürük. Ciddi şəkildə vitamin toksikasiyası, yəni vitaminlərin bədəndə aşırı dərəcədə çox olması simptomları ilə qarşılaşırıq”.
Həkim-terapevt avitaminoz xəstəliyindən də danışaraq deyib ki, qış aylarında Günəş şüalarından maksimum az istifadə edildiyinə görə bu dönəmdə D vitamini çatışmazlığına tez-tez rast gəlinir: “Buna görə də xüsusilə qış aylarında vətəndaşlara qan analizlərinin nəticəsinə uyğun olaraq D vitamini qəbul etməsini tövsiyə edirik. D vitamini bütün hüceyrələrimiz, o cümlədən sağlam immun sistemimiz üçün çox vacibdir. Bəzən xəstələrimizdə maqnezium, kalium çatışmazlığı ilə də qarşılaşırıq. Ət yeməklərindən uzaq duranlarda, mədə-bağırsaq sistemi problemi olanlarda B12 vitamininin çatışmazlığını görürük. Bu da özünü bir çox simptomla büruzə verə bilər. Həmin əlamətlər yaddaşın zəifləməsi, əzələlərdə ağrılar, anemiyanın yaranması və sairədir. Eyni zamanda, C vitamini çatışmazlığı zamanı diş ətində qanamalar müşahidə edirik. Qısacası, hər bir vitaminin çatışmazlığına bağlı avitaminoz müşahidə oluna bilər. Bu səbəbdən mütləq simptomlara uyğun olaraq analizlər verib, nəticələrə əsasən müalicə almaq daha məqsədəuyğundur”.
Bölmənin digər xəbərləri
