NABUKKO LAYİHƏSİ KONSORSİUMU KƏMƏRİ DOLDURMAQ ÜÇÜN İRAN QAZINDAN İSTİFADƏ İMKANLARINI İSTİSNA ETMİR
İran Nabukko layihəsi üçün ən vacib qaz təchizatçılarından biri ola bilər. AZƏRTAC xəbər verir ki, bu fikri Macarıstanın həmin layihədəki xüsusi nümayəndəsi Mixay Bayyer beynəlxalq işlər üzrə parlament komissiyasının iclasında çıxışında bildirmişdir.
M.Bayyer vurğulamışdır: “Amerikalı tərəfdaşlar və Avropa İttifaqı hesab edirlər ki, hazırda İran ətrafında yaranmış vəziyyətlə əlaqədar siyasi səbəblərə görə bu ölkədən qaz alınması qeyri-mümkündür. Lakin beynəlxalq konsorsium ümidvardır ki, İran qazı gec-tez kəmər üçün əlçatan olacaqdır və İran bizim ən əhəmiyyətli mənbələrimizdən birinə çevriləcəkdir”. M.Bayyer əlavə etmişdir ki, Rusiya qazından istifadə imkanlarını tamamilə istisna etmək olmaz. Onun sözlərinə görə, hələlik layihə üçün əsas mənbə Azərbaycandır və ona Türkmənistan qoşula bilər.
M.Bayyer bildirmişdir ki, layihədə marağı olan ölkələrin hökumətləri arasında saziş bu ilin axırında imzalana bilər. Bununla bağlı danışıqların isə sentyabrda Haaqada başlanması mümkündür.
Macarıstanlı xüsusi nümayəndənin qənaətincə, qaz kəmərinin inşasına xərclərin 7,9 milyard avroyadək artması layihənin nəzərdə tutduğu kimi 2013-cü ildə işə salınmasına təhlükə yaratmır. Layihənin artan dəyərini uzunmüddətli perspektivdə paylanacaq qazın qiymətlərinə əlavə etmək olar.
Bölmənin digər xəbərləri
