Narın satış qiymətinin ucuz olması fermerləri narahat edir
Saatlı, 18 oktyabr, Aydın Yavərzadə, AZƏRTAC
Mil-Muğan bölgəsindən olan bəzi fermerlər çoxillik nar bağlarını mövsümi əkinlə əvəz etməyə başlayıblar. Səbəb isə narın bazarlarda qiymətinin aşağı olmasıdır.
Fermerlər AZƏRTAC-ın bölgə müxbirinə bildiriblər ki, Saatlı və Sabirabad rayonlarında narın qiyməti ona çəkilən xərci qarşılamadığı üçün bağların saxlanması da sərfəli deyil. Buna görə də nar bağlarının ərazisi getdikcə azalır.
Saatlının Şirinbəy kəndindən olan fermer Qurbanəli Sərdaroğlu uzun illərdir qazancını nar təsərrüfatından əldə edib. Deyir ki, ötən ilə kimi nar bağı 1,5 hektar ərazini əhatə edirdi, həmin bağı 13 il əvvəl salmışdı. "Bağda 1300 nar ağacı var idi, qulluq edirdik, xərc qoyurduq, dərmanlama və qulluq işlərinə azı 2 min manat xərc çəkirdik. Əziyyətimizin qarşısında bol məhsul əldə etsək də, alıcı tapa bilmirdik. Bu isə çəkdiyimiz xərclərin hədər getməsinə səbəb olurdu. Qərara gəldim ki, bağı mövsümi əkinlərlə əvəzləyim və Türkiyədən yem bitkisi olan "reyqras" toxumu gətirib əkdim. Darı və yonca sahəsi də salacam, nardan daha gəlirlidir”.
Mövcud vəziyyət Sabirabaddan olan fermerləri də narahat edir. Eldar Muxtarov bildirir ki, bağında yetişdirdiyi nar sululuğuna, keyfiyyətinə görə dünya bazarına çıxa biləcək məhsuldur. "Uzun illərdir narçılıqla məşğulam,. Sabirabad narı adı ilə tanınır, lakin məhsula qiymət verən yoxdur. Ən yaxşı halda məhsulumuzu paytaxta aparıb 30-40 qəpiyə sata bilirik. Bu da bizə sərf etmir, çəkilən xərclərimizi ödəyə bilmirik”, - deyə o vurğulayır.
Fermerlərin xarici bazara, xüsusən də Rusiya və Ukrayna bazarlarına çıxışı da problemlidir. Deyirlər ki, ən böyük çətinliyi bu bazarlara məhsul aparan alıcılar yaradır. Çünki satış qiymətini həmin alıcılar müəyyən edir. Əksər hallarda isə məcburiyyətdən təklif edilən qiymətə razılaşmalı olurlar.
Fermer Rəfael Musazadənin sözlərinə görə, mövsümün əvvəlində narın qiyməti 1 manat 20 qəpiyə olur, sonra 50-40 qəpiyə qədər düşür: “Ona görə də alıcılar narı istədikləri qiymətə alırlar. Bu da biz fermerləri qane etmir, narın qiyməti azı 2 manat olsa, bizə sərfəli olar”.
Məhsulun satışında yaranan çətinliklə bərabər, narın yetişmə dövründə hava şəraitinin yağıntılı keçməsi də bir başqa problemdir. Çünki əlverişsiz hava şəraiti məhsulun bir hissəsinin itkisinə səbəb olur.
Məhsulun xarici bazara çıxarılmasına gəldikdə, Azərbaycan Respublikasının İxracın və İnvestisiyaların Təşviqi Agentliyi - AZPROMO-dan bildirildi ki, "Made in Azerbaijan" brendinin təşviqi mexanizmi vasitəsilə Azərbaycanda ixracatçılara daim dəstək göstərilir. Bu mexanizm vasitəsilə yerli ixracatçılara bazar araşdırmalarının keçirilməsində, sertifikartların alınmasında və beynəlxalq sərgi-yarmarkalarda vahid stend və digər üsullar vasitəsilə satış yollarının axtarışında kömək göstərilir və fermerlər bundan yararlanaraq öz məhsullarını satmaq imkanı əldə edə bilərlər.
Bölmənin digər xəbərləri
