NARKOMANLIĞA VƏ NARKOTİK VASİTƏLƏRİN QANUNSUZ DÖVRİYYƏSİNƏ QARŞI MÜBARİZƏ DAVAM EDİR
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasından AZƏRTAC-a daxil olmuş məlumatda bildirilir ki, 2002-ci ilin on ayı ərzində respublikamızın ərazisində narkotiklərlə bağlı 1940 cinayət faktı qeydə alınmışdır.
Həmin dövrdə ayrı-ayrı şəxslərdən 74 kiloqram 941 qram narkotik vasitələr, psixotrop maddələr və prekursorlar, o cümlədən 2 kiloqram 187 qram heroin, 5 kiloqram 922 qram tiryək, 4 kiloqram 859 qram həşiş, 44 kiloqram 334 qram marixuana, 2 kiloqram xaşxaş, 500 ədəd/750 qram/ güclü təsiredici həb, 13 kiloqram 521,3 qram sirkə anhidridi götürülmüşdür.
Hüquq mühafizə orqanları əsas diqqəti yenə də narkotik vasitələrin qanunsuz dövriyyəsinə, daxilolma mənbələrinin aşkar edilməsinə qarşı mübarizəyə yönəltmişlər ki, bu da öz müsbət nəticəsini verir.
Ötən on ayda bu növ cinayətlər törətmiş 28 xarici vətəndaş məsuliyyətə cəlb olunmuş, onlardan 5 kiloqrama yaxın müxtəlif narkotik vasitələr götürülmüşdür. Yaxalanmış əcnəbilərdən 13-ü İran, 7-si Rusiya, 6-sı Gürcüstan, 1-i Ukrayna, 1 nəfəri isə Əlcəzair vətəndaşıdır.
Həmin müddətdə 390 hektar sahədə qanunsuz əkilmiş və yabanı halda bitmiş 501 ton 414 kiloqram narkotik xassəli bitkilər aşkar edilərək məhv olunmuşdur. Respublika ərazisində “Xaşxaş-2002” şərti adı altında kompleks əməliyyat-axtarış və profilaktika tədbirləri davam edir.
Bölmənin digər xəbərləri
