Narkotik vasitələrin satışı ilə məşğul olan 14 nəfər saxlanılıb VİDEO
Bakı, 11 avqust, AZƏRTAC
Polis əməkdaşları narkotik vasitə və psixotrop maddələrin qanunsuz dövriyyəsi ilə məşğul olan şəxslərin saxlanılması istiqamətində əməliyyatları qətiyyətlə davam etdirirlər.
Daxili İşlər Nazirliyinin (DİN) mətbuat xidmətindən AZƏRTAC-a bildiriblər ki, nazirliyin Baş Narkotiklərlə Mübarizə İdarəsinin əməkdaşları narkotiklərin qanunsuz dövriyyəsinə qarşı bir neçə uğurlu əməliyyat tədbiri həyata keçiriblər. Belə ki, əməliyyatlar nəticəsində Bərdə rayonu ərazisində narkotik vasitələrin satışını həyata keçirən, həmçinin Bakıda digər qanunazidd əməllər törədən 5 nəfərdən ibarət mütəşəkkil dəstənin üzvləri saxlanılıblar. Əməliyyat zamanı əvvəllər dəfələrlə məhkum olunmuş Aslan Fərəcov, Asəf Səmədzadə, Mahmud Nəzərov, Rəşad Salahov və Tapdıq Mehdiyev tutulublar. Onların üzərində axtarış aparılarkən külli miqdarda heroin və “Vincester” markalı ov silahı aşkar edilib. Həmçinin Asəf Səmədzadənin üzərindən və idarə etdiyi avtomobildən də ümumilikdə 70 qrama yaxın heroin və metamfetamin aşkarlanıb.
Baş Narkotiklərlə Mübarizə İdarəsinin qərb bölgəsində regional şöbəsinin əməkdaşlarının Füzuli rayonunda həyata keçirdikləri əməliyyat zamanı isə qaçaqmalçılıq yolu ilə ölkə ərazisinə keçirilən külli miqdarda narkotik vasitənin realizə edilməsinin qarşısı alınıb. Əməliyyat zamanı rayonun Böyük Bəhmənli kənd sakini Xalid Məmmədov saxlanılıb. Onun əlindəki bağlamadan və yaşadığı kənddə gizlətdiyi yerdən ümumi çəkisi 5 kiloqramdan artıq heroin, marixuana və 1 kiloqrama yaxın metamfetamin aşkar edilib.
Həmin şöbənin əməkdaşlarının Goranboy rayonunda həyata keçirdikləri növbəti əməliyyat zamanı isə narkotik vasitələrin qanunsuz dövriyyəsi ilə məşğul olan və əvvəllər də eyni əməllərə görə dəfələrlə məhkum olunmuş Tərtər rayon sakinləri Sabir Məmmədov, Dağlar Misirov və Elçin Məmmədov saxlanılıblar. Sonuncunun idarə etdiyi avtomobilə baxış zamanı ümumi çəkisi 10 kiloqram 450 qram olan marixuana aşkar edilib. Onlar ifadələrində marixuananı satmaq məqsədilə əldə etdiklərini bildiriblər.
Baş İdarə əməkdaşlarının Yasamal rayonunda həyata keçirdikləri əməliyyat zamanı isə əvvəllər məhkum olunmuş Əlimurad Abdurəhmanov narkotiklərin onlayn yolla qanunsuz dövriyyəsində şübhəli bilindiyi üçün saxlanılıb. Onun üzərində axtarış aparılan zaman 38 qram heroin, 5 qram metamfetamin, narkotik vasitələrin satışı zamanı istifadə etdiyi iki plastik kart aşkar edilib. Əməliyyat tədbirlərinin davamı olaraq Əlimurad Abdurəhmanovun yaşadığı evdən 2 kiloqram 725 qram heroin, 2 kiloqram 490 qram metamfetamin, 2 kiloqram 80 qram marixuana, 44 ekstazi həbi və bir elektron tərəzi aşkarlanıb.
Əlimurad Abdurəhmanov Bakıda narkotik vasitələrin onlayn yolla satışını təşkil edən şəxslərdən biri olub və o, ifadəsində törətdiyi əməli etiraf edib.
Binəqədi rayonunda həyata keçirilən əməliyyat zamanı Cəlilabad rayon sakini Elşad Əliyev saxlanılıb. Onun üzərindən və Binəqədi rayonundakı evindən ümumilikdə 1 kiloqram 180 qram heroin, metamfetamin və elektron tərəzi aşkarlanıb.
Abşeron və Nəsimi rayonlarında həyata keçirilən digər əməliyyatlar zamanı da narkotik vasitələrin, xüsusilə metamfetaminin satışını ilə məşğul olan üç nəfər saxlanılıb. Xırdalan şəhərində baş tutan əməliyyat zamanı Novruz Baxşıyevdən ümumi çəkisi 1 kiloqram 775 qram olan metamfetamin və heroin aşkarlanıb. Nəsimi rayonunda keçirilən əməliyyatlar zamanı isə Akif Süleymanov və Rasim Hüseynov saxlanılıblar. Bu şəxslərdən də psixotrop maddə olan metamfetamin aşkarlanaraq maddi sübut kimi götürülüb.
Bu əməliyyatlar zamanı narkotik vasitələrin qanunsuz dövriyyəsi ilə məşğul olan 14 nəfər məsuliyyətə cəlb edilib və qanunsuz dövriyyədən ümumilikdə 27 kiloqramdan artıq narkotik vasitə və psixotrop maddə çıxarılıb. Faktlarla bağlı Cinayət Məcəlləsinin müvafiq maddələri ilə cinayət işləri başlanıb. Həmin şəxslər tutularaq istintaqa cəlb olunublar. Zəruri istintaq-əməliyyat tədbirləri davam etdirilir.
Daxili İşlər Nazirliyi vətəndaşlara, xüsusilə sosial şəbəkə istifadəçilərinə bir daha müraciət edərək bildirir ki, narkotik vasitələrin satışı və qanunsuz dövriyyəsi barədə əllərində olan məlumatları polis əməkdaşları ilə bölüşməkdən çəkinməsinlər. Bunun üçün məlumatlı şəxslər nazirliyin və Baş Narkotiklərlə Mübarizə İdarəsinin sosial şəbəkələrdəki rəsmi ünvanlarına da müraciət edə bilərlər.
Bölmənin digər xəbərləri
