Naxçıvan Dövlət Universitetində bu günədək 1593 nəfər magistr dərəcəsi alıb
Naxçıvan, 25 may, AZƏRTAC
İyirmi bir il bundan əvvəl 7 ixtisas üzrə 27 nəfərə magistr təhsili verməyə başlayan Naxçıvan Dövlət Universitetində (NDU) hazırda I kursda 55 ixtisas üzrə 138, II kursda isə 35 ixtisas üzrə 103 magistr əyani təhsil alır. Bu günədək universitetdə 1593 nəfər magistr dərəcəsi alıb.
NDU-nun mətbuat şöbəsində AZƏRTAC-ın Naxçıvan bürosuna bildirilib ki, bu faktlar universitetdə keçirilən magistrantların X regional elmi konfransında universitetin magistratura üzrə dekanı, biologiya üzrə elmlər doktoru Etibar Məmmədov tərəfindən səsləndirilib.
Tədbirdə çıxış edən universitetin rektoru, AMEA-nın müxbir üzvü Saleh Məhərrəmov gənc tədqiqatçıların elmi fəaliyyətlərinin stimullaşdırılması nəticəsində elmi-tədqiqat işlərinə marağın artdığını diqqətə çatdırıb.
Universitetin elmi işlər üzrə prorektoru, dosent Mübariz Nuriyev dissertasiyaların yazılması üçün ilk olaraq elmi problemin qoyuluşu, işin aktuallığının mühüm əhəmiyyət kəsb etməsi haqqında danışıb.
Konfransda universitetin Dövlət hüququ ixtisası üzrə I kurs magistrantı Əziz Qasımovun “Vərəsəlik hüququ” mövzusunda çıxışı dinlənilib.
Təsviri incəsənət tarixi və nəzəriyyəsi ixtisası üzrə II kurs magistrant Gülbani Əliyevaya “İlin magistrantı” diplomu təqdim edilib.
Konfrans bölmə iclasları ilə davam edib, qiymətləndirilən məqalə müəlliflərinə universitetin diplomları təqdim olunub.
Bölmənin digər xəbərləri
