Naxçıvan Dövlət Universitetində I Beynəlxalq Mədəni İrs və Dayanıqlı Turizm Konfransı keçirilib
Naxçıvan, 26 may, AZƏRTAC
Naxçıvan Dövlət Universitetində “Şəhərsalma və Memarlıq İli” çərçivəsində Memar Əcəmi Naxçıvaninin 900 illiyinə həsr olunmuş I Beynəlxalq Mədəni İrs və Dayanıqlı Turizm Konfransı (ICCHST – Naxçıvan 2026) təşkil olunub.
NDU-nun Media və ictimaiyyətlə əlaqələr şöbəsindən AZƏRTAC-ın bölgə müxbirinə bildirilib ki, konfrans Naxçıvan və Mingəçevir dövlət universitetlərinin birgə təşkilatçılığı, Azərbaycan Turizm və Menecment, Macarıstanın Széchenyi Istvan, Özbəkistanın Daşkənd Dövlət İqtisad, Türkiyənin Qaradəniz Texniki, Akdeniz, Gümüşhane, Ankara Hacı Bayram Veli, Pamukkale, Bayburt və Adıyaman universitetlərinin tərəfdaşlığı ilə keçirilib.
Konfransdan əvvəl Ümummilli Lider Heydər Əliyevin Naxçıvan şəhərindəki abidəsi və Heydər Əliyev Muzeyi ziyarət olunub.
NDU-nun Memarlıq və mühəndislik fakültəsində təşkil olunan memarlıq sərgisinə də baxış olub. Sərgi zamanı Mingəçevir Dövlət Universitetinin rektoru Anar Eminov tərəfindən NDU-nun rektoru Elbrus İsayevə Azərbaycanın 5 bölgəsinə məxsus xalça ornamentlərindən ibarət döş nişanları hədiyyə olunub. Fakültə kollektivi Memar Əcəmi ilə bağlı nəşrləri MDU nümayəndə heyətinə təqdim edib.
Sonra qonaqlar Pedaqoji fakültədə nümayiş olunan əl işləri sərgisi ilə tanış olub, İnklüziv Təhsil Mərkəzi, kulinariya, xalçaçılıq və milli geyim otaqlarına baş çəkiblər. Kampus gəzintisi NDU-nun İncəsənət fakültəsində təşkil olunan rəsm sərgisinə baxışla davam edib.
NDU-nun konqres mərkəzində keçirilən konfrans Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
Tədbiri açan Naxçıvan Dövlət Universitetinin rektoru Elbrus İsayev çıxışında bildirib ki, I Beynəlxalq Mədəni İrs və Dayanıqlı Turizm Konfransının əsas məqsədi mədəni irsin qorunması və dayanıqlı turizmin inkişafı sahəsində aparılan müasir elmi tədqiqatların müzakirəsi, elmi fikir mübadiləsinin təşviqi və bu istiqamətdə beynəlxalq əməkdaşlıqların gücləndirilməsidir. Rektor vurğulayıb ki, bu gün şəhərsalma və memarlıq sahəsində aparılan işlər xüsusilə işğaldan azad olunmuş ərazilərdə həyata keçirilən “Böyük Qayıdış” Proqramı çərçivəsində yeni mərhələyə qədəm qoyub. Prezident İlham Əliyevin təşəbbüsü ilə “Ağıllı şəhər” və “Ağıllı kənd” layihələri reallaşdırılır və bu, müasir şəhərsalma modelinin formalaşmasına xidmət edir. Bu layihələr təkcə Azərbaycan üçün deyil, ümumilikdə, Türk dünyası və beynəlxalq təcrübə üçün də əhəmiyyətli nümunədir.
Mingəçevir Dövlət Universitetinin rektoru Anar Eminov çıxışında innovativ yanaşmalar əsasında universitetlərin nəzəri biliklə yanaşı, həm də praktik və sənayeyönümlü həllər formalaşdıran elmi mərkəzlər kimi fəaliyyət göstərməsinin vacibliyini vurğulayıb. Qeyd edib ki, turizm və xidmət sənayesi ilə əlaqəli tədqiqatların genişləndirilməsi, sənayeyönümlü layihələrin təşviqi və magistr səviyyəsində hazırlanan dissertasiya işlərinin regional turizm inkişafı, mədəni irsin rəqəmsallaşdırılması kimi tətbiqyönümlü istiqamətlərə yönəldilməsi xüsusi əhəmiyyət daşıyır.
Gümüşhane Universitetinin rektoru Oktay Yıldız çıxışında universitetlərin turizm sahəsində gördüyü işlərin ictimai töhfə baxımından mühüm əhəmiyyət daşıdığını vurğulayıb. Bu sahədə NDU-nun təcrübəsini yüksək qiymətləndirib.
Milli Məclisin deputatı, Naxçıvan Rəssamlar Birliyinin sədri Ülviyyə Həmzəyeva ölkəmizdə mədəni irsin qorunması, tarixi abidələrin bərpası, turizm potensialının inkişaf etdirilməsi yönündə aparılan işlərdən, bu sahəyə göstərilən dövlət qayğısından bəhs edib.
Videoformatda çıxış edən Akdeniz Universitetinin rektoru, professor Özlenen Özkan və Pamukkale Universitetinin rektoru, professor Mahmud Güngör konfransın beynəlxalq əhəmiyyətini yüksək dəyərləndiriblər.
NDU-nun Elm və innovasiya məsələləri üzrə prorektoru Elsəvər Əsədov qeyd edib ki, konfransın bölmə iclaslarında 6 istiqamət üzrə 17 bölmədə ölkəmizin və dünyanın 40 elm-təhsil müəssisəsindən 212 əməkdaşın 156 məruzəsi, eyni zamanda tələbə bölməsində 10 tələbənin məruzəsi dinləniləcək.
Rəsmi hissənin davamında qarşılıqlı hədiyyələr və plaketlər, universitetin bir sıra əməkdaşına isə təşəkkürnamələr təqdim edilib.
Tədbir milli-mədəni dəyərlərimizi əks etdirən “Sazın sədası” adlı konsert proqramı ilə davam edib və iştirakçılara Azərbaycan aşıq sənətinin zəngin ənənələri təqdim olunub.
Müxbir- Nail Əsgərov
Bölmənin digər xəbərləri
