Naxçıvanda 14 şəhid ailəsinə mənzil verilib
Naxçıvan, 29 oktyabr, AZƏRTAC
Muxtar respublikada yanvar-sentyabr aylarında aylıq gəlirləri ehtiyac meyarından aşağı olan 421 ailəyə ünvanlı dövlət sosial yardımı ödənilib, 14 şəhid ailəsinə mənzil verilib.
AZƏRTAC-ın Naxçıvan bürosu xəbər verir ki, Naxçıvan Muxtar Respublikası Dövlət Statistika Komitəsinin məlumatına əsasən, bu dövrdə Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi zamanı sağlamlıq imkanlarını qismən itirmiş 2 nəfərə, Çernobıl Atom Elektrik Stansiyasında baş vermiş qəzanın aradan qaldırılmasında iştirak edən 1 nəfərə və hərbi xidmət vəzifələrinin icrası zamanı sağlamlıq imkanları məhdudlaşmış 2 nəfərə, ümumilikdə, 5 nəfərə minik avtomobili təqdim edilib.
Muxtar respublikada 160 aztəminatlı ailənin hər birinə 2 baş iribuynuzlu, 45 ailənin hər birinə 20 baş xırdabuynuzlu heyvan, 21 ailənin hər birinə miniyerşumlayan aqreqat, 4 ailənin hər birinə 10 arı ailəsi, 4 ailənin hər birinə otbiçən aqreqat, 3 ailənin hər birinə inkubator aparatı, 2 ailənin hər birinə odunkəsən və otbiçən aparat, 2 ailənin hər birinə unlu və qənnadı məmulatlarının hazırlanması avadanlığı və ləvazimatları, 2 ailənin hər birinə dərzi avadanlıqları və ləvazimatları, 2 ailənin hər birinə döşəmə hamarlayan dəzgah, 1 ailəyə inkubator və quş tükü təmizləyən aparat, 1 ailəyə mebellərin təmiri və üzlənməsi avadanlığı, 1 ailəyə qaynaqçı avadanlığı və ləvazimatları, 1 ailəyə otdoğrayan aqreqat, 1 ailəyə iaşə xidmətinin göstərilməsi üçün avadanlıqlar verilib. Ümumilikdə, 2021-ci ilin doqquz ayında 250 aztəminatlı ailənin özünüməşğulluğu təmin edilib. Bundan əlavə, monitorinqlər aparılaraq təsərrüfatlarını nümunəvi inkişaf etdirən 5 ailəyə arpa-buğda qıran, 3 ailəyə otdoğrayan və 1 ailəyə südsağan aqreqatlar verilib.
Hesabat dövrünün sonuna 298 tənha ahıl və əlil vətəndaşlara evlərində sosial xidmət göstərilib, Naxçıvan Əlillərin Bərpa Mərkəzində 197 nəfərin, Naxçıvan Uşaq Bərpa Mərkəzində 208 uşağın müalicəsi təşkil edilib. Sağlamlıq imkanları məhdud şəxslər 483 texniki və 414 köməkçi reabilitasiya vasitələri ilə təmin olunub, 211 nəfərə protez-ortopediya xidmətləri göstərilib.
Naxçıvan Muxtar Respublikasında sağlamlıq imkanları məhdud uşaqların təhsilə cəlbində davamlılığın təmin edilməsi, bu sahədə təlim-tədris proseslərinin daha da müasirləşdirilməsi və sağlamlıq imkanları məhdud uşaqların cəmiyyətə inteqrasiyası məqsədilə Naxçıvan Muxtar Respublikası Ali Məclisi Sədrinin 2021-ci il 15 mart tarixli Sərəncamı ilə “2021-2025-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı” təsdiq edilib.
Heydər Əliyev Sarayında və “Naxçıvanqala” Tarix-Memarlıq Muzey Kompleksində məhdud fiziki imkanlıların və digər kateqoriyalardan olan şəxslərin, ümumilikdə, 1858 ədəd rəsm və əl işinin sərgisi təşkil olunub, 576 əsər satılıb.
Muxtar respublikada əhalinin yaşayış səviyyəsinin yüksəldilməsi, öz növbəsində, demoqrafik vəziyyətə müsbət təsir göstərib, əhalinin sayı bir il öncəyə nisbətdə artaraq 1 sentyabr 2021-ci il tarixə 462 min nəfərdən artıq olub.
Bölmənin digər xəbərləri
