Naxçıvanın Bakıdakı daimi nümayəndəliyində azərbaycanlıların soyqırımına həsr olunmuş anım tədbiri keçirilib
Bakı, 30 mart, AZƏRTAC
Martın 30-da Naxçıvan Muxtar Respublikasının Bakı şəhərindəki daimi nümayəndəliyində 31 mart - Azərbaycanlıların Soyqırımı Günü ilə əlaqədar anım tədbiri keçirilib.
Daimi nümayəndəlikdən AZƏRTAC-a bildiriblər ki, anım tədbiri faciə qurbanlarının xatirəsinin bir dəqiqəlik sükutla yad edilməsi ilə başlanıb.
Tədbirdə çıxış edən daimi nümayəndəliyin rəhbəri Bəxtiyar Əsgərov soyqırımının tarixindən, XX əsrin əvvəllərində erməni millətçilərinin “böyük Ermənistan” yaratmaq xülyası ilə Bakıda və Azərbaycanın bölgələrində əhaliyə amansız divan tutmasından, talanlar törətməsindən danışıb. O qeyd edib ki, azərbaycanlılara qarşı iki əsr davam edən genişmiqyaslı qanlı soyqırımı nəticəsində yüzlərlə yaşayış məntəqəsi yerlə-yeksan edilib, minlərlə azərbaycanlı xüsusi qəddarlıqla qətlə yetirilib. Ermənilərin Azərbaycana qarşı uzun illər boyu apardığı ardıcıl etnik təmizləmə, soyqırımı və təcavüz nəticəsində on minlərlə insan elindən-obasından didərgin düşüb.
Mart soyqırımı 1918-ci ilin 30 mart və 3 aprel tarixləri arasında Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Qarabağ, Naxçıvan və digər ərazilərdə daşnak erməni silahlı dəstələrinin azərbaycanlılara qarşı törətdikləri soyqırımıdır. Bir neçə il əvvəl Quba yaxınlığında tapılan və alimlərimiz tərəfindən araşdırılan insan sümükləri, kəllələri bunu bir daha sübut edir. Qatı daşnak Andronikin rəhbərliyi altında erməni dəstələri Naxçıvanda 11, Ordubadda 9, Culfada 3 kəndi viran qoyub, 20 minə yaxın dinc əhali bu ərazidə qətlə yetirilib. Azərbaycan Xalq Cümhuriyyəti dövründə bu hadisələrin öyrənilməsi ilə bağlı xeyli iş görülmüş, 1918-ci ilin iyulunda Xəlil bəy Xasməmmədovun başçılığı ilə Fövqəladə Təhqiqat Komissiyası yaradılmış, 36 cildlik, 3500 səhifəlik istintaq materialı toplanmışdı. Bu gün bu materiallar 1918-ci il Mart Soyqırımını öyrənmək üçün dəyərli mənbələrdən biri hesab olunur.
Azərbaycanda Sovet rejimi qurulduqdan sonra isə bu hadisələr xalqdan qəsdən gizlədilib, arxivlər bağlı saxlanılıb. Lakin ölkəmiz dövlət müstəqilliyini bərpa etdikdən sonra xalqımıza qarşı törədilən faciələrin obyektiv şəkildə öyrənilməsi istiqamətində geniş imkanlar açılıb.
Natiq vurğulayıb ki, ulu öndər Heydər Əliyevin yenidən hakimiyyətə qayıdışından sonra bu məsələyə prinsipial yanaşma nümayiş etdirilib, erməni millətçilərinin xalqımıza qarşı illərlə, əsrlərlə reallaşdırdıqları soyqırımı və deportasiya siyasətinin mahiyyəti bütünlüklə açıqlanıb və ifşa olunub. Ümummilli lider Heydər Əliyevin “Azərbaycanlıların soyqırımı haqqında” 1998-ci il 26 mart tarixli Fərmanı ilə xalqımıza qarşı törədilmiş ağır cinayətlərə hüquqi-siyasi qiymət verilib. Azərbaycan Respublikasının Prezidenti İlham Əliyevin 2009-cu il 30 dekabr tarixli Sərəncamına əsasən, erməni millətçilərinin cinayətkar əməllərinin dünya ictimaiyyətinə çatdırılması, Azərbaycan xalqının gələcək nəsillərinin milli yaddaşının qorunması və soyqırımı qurbanlarının xatirəsinin əbədiləşdirilməsi məqsədilə Quba şəhərində Soyqırımı Memorial Kompleksinin yaradılması xüsusi olaraq diqqətə çatdırılıb. Prezident İlham Əliyevin rəhbərliyi ilə erməni təcavüzünün nəticələrinin aradan qaldırılması, respublikamızın ərazi bütövlüyünün və suverenliyinin təmin edilməsi, aparıcı dünya dövlətləri və nüfuzlu beynəlxalq dairələr tərəfindən ölkəmizin ədalətli mövqeyinin etiraf olunması və müdafiəsi istiqamətində ardıcıl və məqsədyönlü işlər görülür.
Bəxtiyar Əsgərov onu da əlavə edib ki, 31 Mart Soyqırımı bəşər tarixinə qanlı bir ləkədir. Bu qanlı soyqırımının nəzərəçarpan obyektiv mənzərəsi isə sadəcə böyük bir imperiyanın çökməsindən sonra daha yaxşı görünməyə başlayıb.
Vurğulanıb ki, dünya ictimaiyyəti artıq təcavüzkarı və təcavüzə məruz qalan ölkəni çox yaxşı tanıyır. Bütün Azərbaycan xalqı inanır ki, Prezident İlham Əliyevin apardığı uğurlu xarici siyasət kursu nəticəsində Azərbaycanın ermənilər tərəfindən işğal edilmiş tarixi torpaqları tezliklə azad olunacaq və soydaşlarımız tarixi torpaqlarına geri qayıdacaqlar.
Daimi nümayəndəliyin rəhbəri Azərbaycanın hər yerində olduğu kimi, Naxçıvan Muxtar Respublikasında da 31 Mart - Azərbaycanlıların Soyqırımı Günü ilə əlaqədar hər il silsilə anım tədbirlərinin keçirildiyini və bu məsələnin Naxçıvan Muxtar Respublikasının ali vəzifəli şəxsi tərəfindən yüksək diqqətdə saxlanıldığını xüsusi qeyd edib. Muxtar Respublikanın bütün ərazisində soyqırımı qurbanlarının yad edilməsi, bununla bağlı şəhər və rayonlarda yüksək səviyyəli anım tədbirlərinin qeyd edilməsi muxtar respublika sakinlərinin bu qanlı hadisələri yada salması və tarixən erməni qəsbkarları tərəfindən xalqımıza qarşı aparılan mənfur siyasətin xatırlanması və öyrənilməsi baxımından böyük əhəmiyyət kəsb etdiyi diqqətə çatdırılıb.
Bəxtiyar Əsgərov Naxçıvan Muxtar Respublikasının soyqırımına məruz qalmış kənd və şəhərlərində 31 Mart Soyqırımı qurbanlarının xatirəsinə möhtəşəm Xatirə Komplekslərinin ucaldıldığını bildirib.
Bölmənin digər xəbərləri
