Niderlandda “Azərbaycan xalçalarının möhtəşəmliyi: Sənət vasitəsilə öyrənmək” mövzusunda xalça sərgisi açılıb VİDEO
Haaqa, 22 may, AZƏRTAC
Azərbaycanın Niderland Krallığındakı səfirliyi və "Azərxalça" ASC-nin birgə təşkilatçılığı ilə Haaqa meriyasının “Atrium City Hall” zalında “Azərxalça” ASC-nin yeni “Azərbaycan xalçalarının möhtəşəmliyi: Sənət vasitəsilə öyrənmək” mövzusunda xalça sərgisi açılıb.
AZƏRTAC xəbər verir ki, sərginin açılış mərasimində Haaqa meriyasının rəhbərliyi, Niderlandın müxtəlif dövlət qurumlarının, ölkədə akkreditə olunmuş diplomatik korpusun və beynəlxalq təşkilatların, mədəniyyət, incəsənət, elmi-akademik dairələrin nümayəndələri, Azərbaycan icmasının üzvləri iştirak ediblər.
Ölkəmizin Niderlanddakı səfiri Məmməd Əhmədzadə sərginin Azərbaycan Respublikasının Birinci vitse-prezidenti Mehriban Əliyevanın təşəbbüsü və dəstəyi ilə Azərbaycanın xalçaçılıq sənətinin UNESCO-nun Qeyri-maddi Mədəni İrs üzrə Reprezentativ Siyahısına daxil edilməsinin 15 illiyinə həsr olunmuş müxtəlif ölkələrdə silsilə tədbirlər çərçivəsində keçirildiyini bildirib.
Diplomat Azərbaycanın qədim və zəngin mədəni irsinin bariz nümunələrindən olan xalçaçılıq sənətinin tarixi və ölkəmizdə bu sənətin inkişafına dövlət tərəfindən göstərilən qayğı barədə məlumat verib. O, dünyada məşhur olan Azərbaycan xalçalarının qədimliyini tanınmış Avropa rəssamlarının əsərlərinin də təsdiq etdiyini bildirərək, Niderland rəssamlıq sənətində iz buraxmış Jan van Eyck və Hans Memling kimi məşhurların da öz əsərlərində Azərbaycan xalçalarının ornamentlərindən istifadə etdiklərini deyib.
Səfir qeyd edib ki, sərginin məqsədi sənət vasitəsilə Azərbaycan mədəniyyətini və həqiqətlərini yerli sakinlərə çatdırmaqdır. Bir ay davam edəcək sərgi Azərbaycan və Niderland xalqlarının yaxınlaşmasına töhfə verəcək. O, Haaqa şəhər bələdiyyəsinə sərginin nümayişinə yaradılmış şəraitə görə təşəkkür edib.
Haaqa merinin müavini Nur İkar bələdiyyə binasında Azərbaycanın xalçaçılıq sənətinin nümunələrindən ibarət sərginin açılmasından məmnunluğunu söyləyib, sərginin Azərbaycanın zəngin və qədim mədəni irsini nümayiş etdirdiyini bildirib. O, Azərbaycan xalçalarının gözəlliyinin uzun əsrlər boyu Avropada, eləcə də Niderlandda doğurduğu əks-sədadan və bir sıra məşhur rəssamların və sənətçilərin öz əsərlərində Azərbaycan xalçalarının ornamentlərinə müraciət etməsindən danışıb. Meriyanın binasının Haaqa şəhərinin gündəlik sosial həyatındakı mərkəzi rolunu nəzərə alaraq, sərginin Azərbaycan mədəni irsinin Niderlandda tanıdılmasına böyük töhfə verəcəyini, onun Haaqanın mədəni həyatının daha da zənginləşməsinə xidmət etdiyini vurğulayıb.
"Azərxalça" ASC İdarə Heyətinin sədri, Əməkdar incəsənət xadimi Emin Məmmədov iki ölkə arasındakı mədəni mübadilədə bugünkü tədbirin vacibliyini qeyd edib. İdarə Heyətinin sədri yüzillik “Azərxalça” ASC-nin tarixindən söz açaraq, tarixi boyunca qurumun ən böyük məqsədi Azərbaycan xalçaçılıq sənətinin inkişafı, təbliğatı və təşviqatı olduğunu qeyd edib. O, mayın 2-dən 4-dək Bakıda təşkil edilmiş və dünyaya səs salan Beynəlxalq Xalça Festivalı haqqında tədbir iştirakçılarına məlumat verib. Sərgidə nümayiş olunan bütün xalçaların tarixi və xalçaçılıq məktəblərindən söz açıb.
“Azərxalça” ASC-nin istehsal etdiyi xalçaların ərsəyə gəlməsində yerli və xarici rəssamlarla, eləcə də dizaynerlərlə əməkdaşlıq çərçivəsində ənənəvi xalçalara istinadla müasir xalçalar yaradıldığını, xalça sənətinin daim inkişaf etdiyini diqqətə çatdırıb. “Azərxalça” ASC – nin xalçaların istehsalı ilə yanaşı xalçaçılıq sənətinin qorunub saxlanılması, inkişaf etdirilərək gələcək nəsillərə ötürülməsi, bu sahəyə xüsusilə regionlarda yaşayan toxucu xanımların cəlb olunması, işlə təmin olunması məsələlərində atdığı önəmli addımlardan danışıb.
E. Məmmədov Haaqa Meriyasının təhsil və mədəniyyət işləri üzrə Baş direktoru Korrie Louvesə Azərbaycanın Xalq rəssamı Lətif Kərimovun “Azərbaycan xalçası” kitabını xatirə olaraq təqdim edib.
Tədbir iştirakçılarına nümayiş olunan xalçalar haqqında məlumat verilib. Tədbir konsert proqramı ilə davam edib və “Xarıbülbül” rəqs qrupunun ifasında “Naz eləmə”, “Mirzəyi” və “Uzun dərə” kimi Azərbaycan milli rəqsləri təqdim olunub.
Sərgi çərçivəsində təşkil olunmuş mühazirə və ustad dərsində Azərbaycan xalçalarının simvolizmi və tarixi təqdim olunub, iştirakçılar ənənəvi düyün texnikası ilə tanış olublar və xalça naxışlarının toxunması prosesini praktiki şəkildə sınaqdan keçiriblər. Bu təcrübəni əldə etmiş iştirakçılara xatirə olaraq sertifikatlar təqdim edilib.
Qeyd edək ki, iyunun 20-dək davam edəcək sərgidə Azərbaycan xalça sənətinin müxtəlif dövrlərinə aid seçilmiş nadir 20 xalça nümunəsi nümayiş olunur. Sərginin məqsədi Azərbaycan xalçaçılıq sənətini yalnız estetik dəyərə malik bəzək elementi kimi deyil, eyni zamanda tarixi yaddaşı qoruyan, nəsilləri birləşdirən və milli kimliyi təcəssüm etdirən canlı mədəni fenomen kimi təqdim etməkdir. Ziyarətçilərin xüsusi marağına səbəb olan eksponatlar sırasında Qarabağ xalça məktəbinin Qasımuşağı və Çələbi kompozisiyalarının müasir interpretasiyaları, rəssam Samirə Allahverdiyevanın əsərlərindən ilhamlanaraq hazırlanmış “Bağda meyvələr” adlı 3D teksturalı xalçalar, eləcə də 2024-cü ildə “Architectural Digest” jurnalının “Dünyanın ən yaxşı 100 dizayneri” siyahısına daxil edilmiş alman dizayner Jan Kathın eksklüziv xalçaları yer alır.
Sərginin keçirildiyi Haaqa bələdiyyə binasındakı “Atrium City Hall” gün ərzində təxminən 4 min ziyarətçi qəbul edir ki, bu da bir ay ərzində Azərbaycan xalçalarının geniş auditoriyaya təqdim edilməsinə imkan yaradır.
Şəhla Ağalarova
AZƏRTAC-ın xüsusi müxbiri
Haaqa
Bölmənin digər xəbərləri
