Niderlandda MH17 aviareysinə dair məhkəmə iclası başlayıb
Bakı, 8 iyun, AZƏRTAC
Niderlandın “Schiphol” məhkəmə kompleksində 2014-cü ildə MH17 reysi ilə uçan təyyarənin vurulması ilə bağlı cinayət işi üzrə dördüncü məhkəmə iclası başlayıb.
AZƏRTAC Ukrinform agentliyinə istinadla xəbər verir ki, koronavirus pandemiyası ilə əlaqədar məhkəmədə iştirak edəcək şəxslərin sayı məhdudlaşdırılıb. Məhkəmə iclası niderland və ingilis dillərində canlı yayımlanacaq. İclas iyunun 8-dən iyulun 3-dək keçiriləcək. Koronavirus infeksiyasının yayılması səbəbindən dinləmələrin təxirə salınacağı və ya ləğv ediləcəyi istisna olunmur.
Haaqa dairə məhkəməsi MH17 reysi ilə uçan təyyarənin Ukraynanın Donbas regionunda qəzaya uğramasına dair cinayət işi üzrə dinləmələrə bu ilin martında başlayıb. COVID-19 pandemiyası səbəbindən həmin vaxt yalnız üç məhkəmə iclası baş tutub.
Xatırladaq ki, Amsterdamdan Kuala-Lumpur şəhərinə MH17 reysini həyata keçirən “Malaysia Airlines” aviakompaniyasına məxsus “Boeing-777” təyyarəsi 2014-cü il iyulun 17-də Ukraynanın Donbas regionu üzərində raketlə vurulmuşdu. Qəza nəticəsində təyyarənin göyərtəsindəki 283 sərnişin və 15 ekipaj üzvünün hamısı həlak olmuşdu.
Bölmənin digər xəbərləri
