“NİZAMİ VƏ TARİX”
“Tarix - tələbkar imtahançıdır. Hökmdarlar, saray əyanları, zülmkarlar unudulub getmişlər. Azərbaycanın böyük mütəfəkkir və humanist şairlərinin təravətdən düşməyən misraları isə bu gün də öz hikməti və insanpərvərlik ruhu ilə dünyanı heyran qoyur”.
Filologiya elmləri namizədi Teymur Kərimlinin Azərbaycan Milli Elmlər Akademiyasının “Elm” Redaksiya-Nəşriyyat və Poliqrafiya Mərkəzi tərəfindən çapdan buraxılmış “Nizami və tarix” kitabı Azərbaycan Respublikasının Prezidenti Heydər Əliyevin bu sözləri ilə açılır.
Müəllif monoqrafiyada Nizamini təkcə dünya poeziyasına əvəzsiz incilər bəxş etmiş dahi şair, böyük mütəfəkkir və filosof kimi deyil, həm də tarixçi-şair kimi səciyyələndirir.
Giriş, 7 fəsil və nəticədən ibarət monoqrafiyada Nizami yaradıcılığında tarix və tarixi şəxsiyyət problemi müxtəlif yönlərdən araşdırılır. Tədqiqatçının qənaətinə görə, tarix Nizami üçün təkcə mövzu mənbəyi deyil, həm də poetik fikrin yardımçısı və konteksti, ideya-estetik qayə - ölməz humanist bəşəri idealların ifadə vasitəsi və keçmişin örnəyində gələcəyi yaratmaq cəhdi olmuşdur. Tarixçi, filosof və mütəfəkkir Nizami tarixi qaynaqları ideyalarına uyğun bədii şəkildə mənalandırıb təqdim etmişsə, şair Nizami öz poetika tarixini, tarixi poetikasını yaratmışdır.
Nizamişünaslığa yeni töhfə olan kitabın elmi redaktoru Azərbaycan MEA-nın müxbir üzvü mərhum Yaşar Qarayevdir.
Bölmənin digər xəbərləri
