Növbəti ildə dövlət sosial müdafiə fonduna ayırmalar üzrə əhəmiyyətli artım proqnozlaşdırılıb
Bakı, 4 noyabr, AZƏRTAC
Yeni büdcədənkənar dövlət fondunun yaradılması və əmək qanunvericiliyində nəzərdə tutulan dəyişiklik 2023-cü ilin dövlət büdcəsi layihəsində dövlət büdcəsindən transfert və ayırmaların əhəmiyyətli artımla proqnozlaşdırılmasını şərtləndirib.
Hesablama Palatasından AZƏRTAC-a bildirilib ki, növbəti ildə dövlət büdcəsi xərclərinin 3 milyard 219,5 milyon manatı büdcədən ayırmalar və transfertlər üçün (cari ilin gözləniləni müqayisədə 1 milyard 560,3 milyon manat və yaxud 94 faiz çox) nəzərdə tutulub ki, bu da proqnozlaşdırılan cəmi dövlət büdcəsi xərclərinin 9,7 faizini təşkil edir.
Qeyd edək ki, cari ildə dövlət büdcəsindən transfert və ayırmaların dövlət büdcəsi xərclərinin 5,3 faizini təşkil etməsi gözlənilir. Dövlət büdcəsindən transfert və ayırmalar üzrə növbəti il üçün proqnozlaşdırılan əhəmiyyətli artım əsasən yeni büdcədənkənar dövlət fondunun yaradılması və bu istiqamətdə 1 milyard 263,8 milyon manat vəsaitin nəzərdə tutulması ilə bağlıdır. Təqdim edilmiş məlumatlara əsasən, həmin Fond üzrə əhalinin dövlət büdcəsinin vəsaiti hesabına icbari tibbi sığortalanmasına 1 milyard 134,1 milyon manat, səhiyyə sahəsində dövlət proqramları və tədbirlərə isə 129,7 milyon manat proqnozlaşdırılır. Əvvəlki illərdə adıçəkilən xərclər əhalinin dövlət büdcəsinin vəsaiti hesabına icbari tibbi sığortalanması xərcləri və səhiyyə sahəsində bir sıra dövlət proqramlarının və tədbirlərin maliyyə təminatı adı altında dövlət büdcəsinin xərclərinə daxil edilib (2022-ci ilin gözlənilən icrası 1 milyard 80,6 milyon manat təşkil edir).
Növbəti ildə dövlət sosial müdafiə fonduna ayırmalar üzrə də əhəmiyyətli artım proqnozlaşdırılıb. Belə ki, 2023-cü ilin dövlət büdcəsi layihəsində dövlət sosial müdafiə fondunun büdcəsinin balanslaşdırılması məqsədilə dövlət büdcəsinin öhdəliklərinin maliyyələşdirilməsi üçün 1 milyard 467,8 milyon manat vəsaitin ayrılması nəzərdə tutulub ki, bu da cari ilin gözlənilən icrasından 272,8 milyon manat və ya 22,8 faiz, 2021-ci ilin icra göstəricisindən isə 160,4 milyon manat və yaxud 12,3 faiz çoxdur. Artım əsasən 2023-cü il yanvarın 1-dən “Əmək pensiyaları haqqında” Azərbaycan Respublikasının Qanununa ediləcək dəyişikliklə əlaqədardır. Dəyişikliyə əsasən növbəti ildən pensiyaçılara ödənilən maddi yardımların, eləcə də həmin yardımların indeksləşdirilməsi üzrə yaranacaq xərclərin dövlət büdcəsinin vəsaiti hesabına maliyyələşdirilməsi nəzərdə tutulur.
Qeyd edək ki, cari ilin gözlənilən icra göstəricisi ilə müqayisədə növbəti ildə DSMF-yə transfertlərdə nəzərdə tutulan artım dövlət büdcəsinin “Sosial müdafiə və sosial təminat” bölməsi üzrə proqnozlaşdırılan artımın 34,3 faizini təşkil edir. 2023-cü ilin dövlət büdcəsi layihəsində dövlət büdcəsindən transfertlər (Naxçıvan Muxtar Respublikasının büdcəsinə və yerli büdcələrə verilən dotasiya və yerli büdcələrə verilən subvensiyalar) üzrə ümumilikdə 487,9 milyon manat vəsait nəzərdə tutulub ki, bu da növbəti il üçün proqnozlaşdırılmış dövlət büdcəsi xərclərinin cari ildə olduğu kimi 1,5 faizini təşkil edir. Naxçıvan Muxtar Respublikasının büdcəsinə verilən dotasiya bu istiqamətdə proqnozlaşdırılan cəmi xərclərin 98,6 faizinə bərabərdir.
Bölmənin digər xəbərləri
