Naxçıvan, 1 aprel, AZƏRTAC

Aprelin 1-də “Nuhçıxan” İnformasiya Agentliyinin yaranmasının 1 illiyi münasibətilə tədbir keçirilib.

AZƏRTAC-ın Naxçıvan bürosu xəbər verir ki, aparıcılar muxtar respublikada kütləvi informasiya vasitələrinin inkişafına göstərilən qayğıdan danışıblar.

Naxçıvan Muxtar Respublikası Ali Məclisi Aparatının Mətbuat və ictimaiyyətlə əlaqələr şöbəsinin müdiri Ülvi Hüseynli çıxış edərək Naxçıvan Muxtar Respublikası Ali Məclisinin Sədri Vasif Talıbovun adından ötən 1 ildəki uğurlu fəaliyyətinə görə “Nuhçıxan” İnformasiya Agentliyinin kollektivinə təşəkkür edib. Qeyd olunub ki, ümummilli liderimiz Heydər Əliyevin söz, fikir və mətbuat azadlığının təmin olunması sahəsində əsasını qoyduğu dövlət siyasəti bu gün ölkəmizdə, eləcə də onun Naxçıvan Muxtar Respublikasında uğurla davam etdirilir, kütləvi informasiya vasitələrinin fəaliyyəti üçün geniş imkanlar yaradılır. Mətbuat orqanlarına, teleradiolara olan hərtərəfli qayğının nəticəsidir ki, bu sahədə böyük keyfiyyət dəyişiklikləri yaranıb, informasiya-məlumatlandırma işi günün tələbləri səviyyəsində qurulub, muxtar respublikanın kütləvi informasiya vasitələri yeni inkişaf müstəvisinə çıxıb. Artıq muxtar respublika mətbuatı ən müasir maddi-texniki bazaya malikdir. Təkcə ötən il dövlət teleradiosuna, “Şərq qapısı”, şəhər və rayon qəzetlərinə, Televiziya və Radio Şurasına ümumi dəyəri 250 min manata yaxın olan müxtəlif avadanlıqlar alınıb.

Ülvi Hüseynli deyib ki, “Nuhçıxan” İnformasiya Agentliyinin yaradılması Naxçıvanın informasiya blokadasının yarılmasına, qədim diyarın müasir sosial-iqtisadi inkişafı, tarixi və turizm potensialı haqqında məlumatların geniş oxucu, tamaşaçı və izləyici auditoriyasına çatdırılmasına imkan verib. “Nuhçıxan” İnformasiya Agentliyinin əsas uğurlarından biri də Naxçıvan Muxtar Respublikası barədə informasiyaları dünya miqyasında yaymasıdır. Artıq ölkə və dünya mediası Naxçıvanla bağlı istənilən informasiyada agentliyə istinad edir. Agentliyin ölkəmizdəki, eləcə də Türkiyədəki bir çox informasiya portalları ilə səmərəli əməkdaşlığı var. Bu gün “Nuhçıxan” İnformasiya Agentliyinin kollektivi Naxçıvan həqiqətlərini olduğu kimi ictimaiyyətə çatdırır. Fəxrlə demək olar ki, agentlik qərəzsiz, dəqiq, operativ və obyektiv informasiyanın çatdırılması sahəsində artıq yeni bir yanaşmanın - Naxçıvan nümunəsinin əsasını qoyub.

Bildirilib ki, 1 aprel həm də muxtar respublikada Teleradio Verilişləri Komitəsinin yarandığı gündür. Ülvi Hüseynli bu münasibətlə Dövlət Teleradiosunun kollektivini təbrik edib və onlara gələcək fəaliyyətlərində uğurlar arzulayıb.

“Nuhçıxan” İnformasiya Agentliyinin baş redaktoru Səməd Canbaxşiyev qeyd edib ki, “Nuhçıxan” İnformasiya Agentliyinin ötən bir il ərzində geniş oxucu kütləsinə təqdim etdiyi dəqiq və operativ xəbərlər, məlumatlar müasir jurnalistikanın tələblərinə uyğun şəkildə işlənərək çatdırılıb. Materiallar internet saytının imkanlarından istifadə edilərək yazı, foto və video formatında hazırlandığı üçün oxucu və izləyicilərin diqqətini çəkməklə yanaşı, onlar üçün rahat və əlçatan olub. Əməkdaşlar bir il ərzində “Nuhçıxan” İnformasiya Agentliyinin saytında 13 mindən çox xəbər yerləşdiriblər. “Nuhçıxan” İnformasiya Agentliyi həm də yaradıcılıq üslubu ilə fərqlənir. Yoxlanılmış dəqiq faktlar, tutarlı dəlillər, rəsmi mənbələrdən əldə edilən məlumatların təqdimatı sayta oxucu və izləyici auditoriyasının inamını qazandırıb. Naxçıvan Muxtar Respublikası Ali Məclisi Sədrinin Sərəncam və Fərmanlarını, rəsmi qurumların mətbuat xidmətlərinin göndərdiyi məlumatları, peşəkar jurnalistlərin yazdığı ictimai-siyasi əhəmiyyətli yazıları hər gün on minlərlə insan maraqla məhz “Nuhxçıxan”dan izləyir. Azərbaycan Respublikasının Əməkdar jurnalisti Qahirə Hüseynova tədbirdə çıxış edərək bildirib ki, “Nuhçıxan” Naxçıvan Muxtar Respublikasının mətbuat tarixində informasiya blokadasının yarılmasında yeni bir tarixi mərhələnin başlanğıcını qoyub. Muxtar respublika ziyalıları, peşəkar və gənc jurnalistlər üçün əsl mənada yaradıcılıq tribunasına çevrilən “Nuhçıxan” İnformasiya Agentliyinin saytında onların elmi, publisistik yazılarına geniş yer verilir. Qahirə Hüseynova agentliyə bundan sonrakı fəaliyyətində uğurlar arzulayıb.

Tədbirdə çıxış edən Naxçıvan Muxtar Respublikası Dövlət Televiziya və Radio Verilişləri Komitəsinin sədri Sahil Tahirli deyib ki, müstəqillik illərində Naxçıvan Muxtar Respublikası Ali Məclisinin Sədri Vasif Talıbovun diqqət və qayğısı ilə Naxçıvan Dövlət Televiziyası və Radiosu böyük inkişaf yolu keçib, teleradio müstəqil kanalda yayımlanmağa başlayıb. Müxtəlif illərdə teleradionun maddi-texniki bazası xeyli gücləndirilib, teleradionun binası əsaslı yenidənqurmadan sonra istifadəyə verilib, müasir texniki avadanlıqlarla təchiz edilib. Yeni yayım avadanlıqları qısa zamanda analoq yayımın yüksəkkeyfiyyətli rəqəmsal yayımla əvəzlənməsinə şərait yaratdı. Beləliklə, Naxçıvan Dövlət Televiziyası ölkəmizdə ilk dəfə olaraq yüksəkkeyfiyyətli HD formatda yayıma başladı. İlbəil avadanlıqları yeniləşdirilən dövlət teleradiosunda bu gün dünyanın qabaqcıl ölkələrinin teleradiolarında istifadə olunan ən müasir texniki avadanlıqlar quraşdırılıb. Naxcivantv.az saytının və “Nuhçıxan” İnformasiya Agentliyinin fəaliyyətini təşkil etmək məqsədilə televiziyada “İnformasiya təminatı və saytlarla iş redaksiyası” yaradılıb. Geniş izləyici kütləsi toplayan “Nuhçıxan” İnformasiya Agentliyi Naxçıvanın mühüm informasiya mənbəyi olmaqla yanaşı, həm də müstəqil ölkəmizin əsas informasiya portallarından birinə çevrilib.

Qeyd olunub ki, bu gün dünyanın istənilən yerində televiziyanın izlənilməsi muxtar respublikanın tanıdılmasına, diyarımızda həyata keçirilən böyük quruculuq tədbirlərinin, insanların yaşayış səviyyəsi, qədim diyarın mədəniyyəti, tarixi-mədəni irsi və milli dəyərləri haqqında məlumatların daha geniş izləyici kütləsinə çatdırılmasına imkan verir. Naxçıvan Teleradiosu və “Nuhçıxan” İnformasiya Agentliyi muxtar respublikanın dünyaya açılan pəncərəsi olaraq Naxçıvanın dünyada tanıdılması və təbliği işini bundan sonra da uğurla davam etdirəcək. Sahil Tahirli yaradılan şəraitə, göstərilən yüksək diqqət və qayğıya görə kollektiv adından Naxçıvan Muxtar Respublikası Ali Məclisinin Sədrinə dərin minnətdarlığını bildirib.

Çıxışlardan sonra Naxçıvan teleradiosunun və “Nuhçıxan” İnformasiya Agentliyinin fəaliyyətindən bəhs edən videoçarx təqdim olunub.

Sonra işlərində fərqlənən əməkdaşlara, eləcə də agentliklə fəal əməkdaşlıq edən dövlət orqanlarının mətbuat xidmətlərinin rəhbərlərinə və informasiyaların sosial şəbəkələrdə yayılmasında fəallıq göstərən bir qrup gəncə fəxri fərman və hədiyyələr təqdim edilib.

Dövlət Yol Polisi İdarəsinin Təbliğat üzrə baş inspektoru Ayaz İsmayılov, Səhiyyə Nazirliyinin mətbuat və ictimaiyyətlə əlaqələr üzrə baş məsləhətçisi Hüseyn Əsgərov, AMEA Naxçıvan Bölməsinin mətbuat və ictimaiyyətlə əlaqələr üzrə baş məsləhətçisi Türkanə Bəylərli, Əlahiddə Ümumqoşun Ordunun mətbuat xidmətinin rəhbəri Nəriman Nəcəfov, “Şərq qapısı” qəzetinin müxbiri Mətanət Məmmədova, “Şərqin səhəri” qəzetinin məsul katibi, tədqiqatçı-jurnalist Zaleh Novruzov, Televiziya və Radio Şurasının üzvü Sara Əzimova, ”Nuhçıxan” İnformasiya Agentliyinin kompüter-qrafikaçısı Sahil Məmmədzadə və agentliyin məlumatlarının sosial şəbəkələrdə yayılmasında aktiv fəaliyyət göstərdiyinə görə Naxçıvan televiziyasının kinooperatoru Elşad Heydərov fəxri fərmanla təltif olunublar. Eyni zamanda, “Nuhçıxan” İnformasiya Agentliyinin video və veb məlumatlarının yayılmasında fəal iştirak etdiyinə görə Culfa rayon Milax kənd sakini, fəal gənc Loğman Quliyev, Sədərək rayon sakini, fəal gənc Aygün Həsənbəyli və Culfa rayon Əlincə kənd sakini, fəal gənc Kamran Hümbətov fəxri fərman və qiymətli hədiyyələrlə mükafatlandırılıblar.

Təltif olunanlardan Hüseyn Əsgərov, Ayaz İsmayılov, Mətanət Məmmədova, Zaleh Novruzov, Elşad Heydərov göstərilən diqqətə görə minnətdarlıqlarını bildiriblər.

“Şərq qapısı” qəzetinin baş redaktoru Mehriban Sultanova, Naxçıvan Mətbuat Şurasının sədri Rövşən Hüseynov, Gənclər Fondunun icraçı direktoru Cəbi Quliyev, AZƏRTAC-ın Naxçıvan bürosunun rəhbəri Rauf Əliyev və digərləri kollektivi təbrik edib, yeni yaradıcılıq uğurları arzulayıblar.

Televiziya və Radio Şurasının üzvü Sara Əzimova və Naxçıvan Müəllimlər İnstitutunun əməkdaşı Günel İbrahimova Agentliyə xatirə hədiyyələri təqdim ediblər.

Tədbirin bədii hissəsində televiziyanın “Nuhçıxan” xalq çalğı alətləri ansamblı konsert proqramı ilə çıxış edib.

Sonda xatirə şəkli çəkdirilib.