NYU-YORKDA MATƏM TƏDBİRLƏRİ BAŞA ÇATMIŞDIR
Bir il əvvəl Nyu-Yorkda, Vaşinqtonda və Pensilvaniya ştatında terror aktları nəticəsində həlak olanların xatirəsinə həsr edilmiş matəm tədbirləri Prezident Corc Buşun çıxışı ilə başa çatmışdır.
11 sentyabr terror aktlarının törədildiyi andan ötən bir il bütün amerikalılar üçün belə bir “acı həqiqəti dərk etmək ili” olmuşdur ki, Amerikanın konkret düşmənləri var və ölkə “basqınlardan sığorta olunmayıbdır”. ABŞ Prezidenti Corc Buş çərşənbə axşamı belə bir etirafla çıxış etmişdir. Dövlət başçısının faciəli sentyabr hadisələrinin ildönümü ilə əlaqədar Birləşmiş Ştatların xalqına müraciəti Nyu-Yörk körfəzindəki Ellis-aylənd adasından, Azadlıq Heykəlinin önündən səslənmişdir. ABŞ Prezidentinin çıxışını bütün televiziya və radio stansiyaları birbaşa yayımlamışlar.
Buş demişdir ki, terrorçuların hücumu təkcə ABŞ-a qarşı hücum deyil, həm də amerikalıları millət edən amallara qarşı hücum idi. “Bizim dərin əqidəmizə görə, hər bir insanın həyatı qiymətlidir, çünki insana həyat Xaliqdən verilmişdir. Haqq-təala bizi azad və bərabər yaşamaq üçün yaratmışdır.
Həmin sentyabr günündə ölkəmizdə törədilmiş hadisə yeni yüzilliyin ilk böyük döyüşünün başlanğıcını qoymuşdur. Dünyanı terrordan azad etmək əzmində olan dövlətlərin böyük koalisiyası bu döyüşdə ABŞ-ın tərəfindədir”.
11 sentyabr terror aktları qurbanlarının xatirəsinə ehtiram əlaməti olaraq, Corc Buş çıxışından əvvəl Nyu-Yorkda, vaxtilə Dünya Ticarət Mərkəzi binasının qoşa qülləsinin ucaldığı yerə əklil qoydu.
Sonra Ağ evin başçısı və Amerikanın birinci xanımı Lora Buş həlak olanların qohumlarına yaxınlaşaraq, onların hər birinə təsəlli verdi.
Nyu-Yorkun ən cənub hissəsində - Manhetten rayonundakı Batter-parkda 11 sentyabr terror aktları qurbanlarının xatirəsinə əbədi məşəl yandırıldı. Bu mərasimdə Nyu-Yorka, BMT Baş Məclisinin 57-ci sessiyasına gəlmiş 100-dək ölkənin dövlət və hökumət başçıları, xarici işlər nazirləri iştirak edirdilər.
Mərasim camaat üçün bağlı idi. Lakin nyuyorklular mərasimin gedişini şəhərin bütün beş rayonunun ən böyük parklarında qoyulmuş iri monitorlarla izləyə bilmişlər.
Bölmənin digər xəbərləri
