Oğuz rayonunda yaşıllaşdırma aylığı keçirilir
Oğuz, 10 aprel (AZƏRTAC). Ümummilli lider Heydər Əliyevin anadan olmasının 91-ci ildönümü ilə əlaqədar Oğuz rayonunda yaşıllaşdırma aylığı keçirilir. Yeni Azərbaycan Partiyası (YAP) rayon təşkilatının və rayon icra hakimiyyətinin birgə təşəbbüsü ilə keçirilən aylıq çərçivəsində rayon ərazisində 91 min ədəd müxtəlif növ ağacın, o cümlədən meyvə ağaclarının, bəzək və gül kollarının əkilməsi nəzərdə tutulmuşdur.
YAP rayon təşkilatının sədri Saleh Məhərrəmov AZƏRTAC-a bildirmişdir ki, ekoloji mühitin sağlamlaşdırılması məqsədilə keçirilən aksiyada təşkilatın üzvləri, ayrı-ayrı əmək kollektivlərinin nümayəndələri, şəhər və kənd əhalisi yaxından iştirak edirlər. Yaşıllaşdırma aylığı çərçivəsində indiyədək rayon ərazisində, park və xiyabanlarda, müəssisə və təşkilatların həyətlərində, magistral və kəndarası avtomobil yollarının kənarında 31 min ədəd ağac və gül kolları əkilmişdir. Yeni əkilmiş ağac və kollara lazımi aqrotexniki qulluq olunur.
Ağacəkmə aksiyası aprelin sonunadək davam edəcəkdir.
Bölmənin digər xəbərləri
