OLİMPİADANIN 13-CÜ GÜNÜ AZƏRBAYCAN YIĞMASINA DAHA BİR BÜRÜNC MEDAL GƏTİRMİŞDİR
AZƏRTAC xəbər verir ki, avqustun 21-də Azərbaycanın sərbəst güləşçisi Xetaq Qazumov 94 kiloqram çəki dərəcəsində Pekin Olimpiadasının bürünc medalını qazanmışdır. Bu, sərbəst üsulla güləşənlərimizin 2008-ci ilin Oyunlarında ilk və sonuncu medalıdır. Qalan güləşçilərimizin heç biri Olimpiadada onlara bəslənilən ümidlərini doğrulda bilməmişdir.
Üçüncü görüşdə Özbəkistan idmançısı Qurban Qurbanova qalib gələn Xetaq final mərhələsinə çıxmaq üçün həlledici görüşdə Rusiya idmançısı Şirvani Muradova uduzmuşdur. Bununla belə, o, bürünc medal uğrunda mübarizədə Ukrayna idmançısı Georgi Tibilovu asanlıqla məğlubiyyətə uğratmışdır.
Həmin gün çıxış edən Novruz Temrezov (84 kiloqram) və Əli İsayev (120 kiloqram) isə uğur qazana bilməmişlər.
Olimpiadanın 13-cü günü bədii gimnastika üzrə təsnifat yarışları olmuşdur. Şəxsi yarışlarda ölkəmizi Aliyə Qarayeva və Dinara Gimatova təmsil etmişlər. Aliyə halqa və iplə çıxışlara görə 34.725 xal toplayaraq yeddinci yeri tutmuş, Dinara 13-cü yerlə kifayətlənməli olmuşdur. Qrup komandamız isə iplə kompozisiyada 8-ci yerə çıxmışdır.
Təsnifat yarışlarına avqustun 22-də yekun vurulacaqdır.
Xatırladaq ki, idmançılarımız Olimpiadanın 13 günü ərzində bir qızıl, iki gümüş və üç bürünc medal qazanmışlar. Ölkəmiz bu nəticə ilə 33-cü yerdədir. Birinci yeri isə Çin idmançıları tuturlar.
Daha bir medal bizi boks yarışlarında gözləyir. Şahin İmranov avqustun 22-də yarımfinalda yarışacaqdır. Elə həmin gün taekvondoçu Rəşad Əhmədov (80 kiloqram) səkkizdəbir finalda çıxış edəcəkdir.
Bölmənin digər xəbərləri
