OLİMPİYA OYUNLARI ƏRƏFƏSİNDƏ PEKİNİN YAXINLIĞINDAKI İRİ FABRİKLƏR BAĞLANACAQDIR
AZƏRTAC xəbər verir ki, Olimpiya oyunları ərəfəsində və onların keçirilməsi zamanı ekoloji vəziyyəti yaxşılaşdırmaq üçün ÇXR hökuməti Pekinin yaxınlığında yerləşən iri sənaye mərkəzlərində müəssisələrin işini dayandırır.
Çinin “Sinxua” agentliyinin məlumatına görə, Tyantszin şəhərində təqribən 40 sənaye müəssisəsi iyulun 25-dən sentyabrın 30-dək, yəni paralimpiya oyunlarının sonunadək bağlı olacaqdır.
Poladəritmə mərkəzlərindən biri olan Tanşan şəhərində 267 istehsalat, o cümlədən 66 kiçik poladəritmə zavodu, sement istehsalı müəssisəsi, kömür emalı zavodu və elektrik stansiyası bağlanacaqdır. Onlar yalnız ekoloji yoxlamadan keçəndən sonra açılacaqdır.
Olimpiya oyunlarının keçiriləcəyi dövrdə ekoloji vəziyyət, xüsusən, Pekində havanın keyfiyyəti Çin Xalq Respublikası hökuməti üçün ağrılı məsələlərdən biridir. Hökumət Çin paytaxtında ekologiyanın yaxşılaşdırılmasına dair proqrama 20 milyard dollar ayırmışdır.
Bölmənin digər xəbərləri
