Ölkə üzrə məktəblərin yalnız 8 faizinin istilik təchizatı “Azəristiliktəchizat” tərəfindən təmin olunur
Bakı, 15 noyabr, AZƏRTAC
“Azəristiliktəchizat” ASC-nin xidmət zonasına daxil olan yaşayış binaları, təhsil və səhiyyə obyektlərinin istilik sistemlərinin monitorinqi aparılıb və 214 yaşayış binası, 37 təhsil müəssisəsi, 8 səhiyyə obyektinin istilik sistemlərində problemlər olduğu müəyyən edilib.
AZƏRTAC xəbər verir ki, bu sözləri “Azəristiliktəchizat” ASC-nin sədri vəzifəsini müvəqqəti icra edən İlham Mirzəliyev payız-qış mövsümünün başlanması ilə əlaqədar keçirilən brifinqdə deyib.
O bildirib ki, bununla bağlı aidiyyəti qurumlara müvafiq məlumat verilib: “Hazırda 191 yaşayış binası, 19 təhsil müəssisəsi və 4 səhiyyə obyektində mülkiyyətçilər tərəfindən zəruri tədbirlərin görülməsi başa çatdırılmayıb”.
İlham Mirzəliyev qeyd edib ki, ümumilikdə ölkə üzrə məktəblərin 92 faizinin istilik təchizatı təhsil müəssisələrinin özlərinə məxsus istilik mənbələri və ya vasitələri hesabına, yalnız 8 faizi ASC-yə məxsus qazanxanalar vasitəsilə həyata keçirilir.
Bölmənin digər xəbərləri
