ÖLKƏNİN ENERJİ SİSTEMİNİN MODERNLƏŞDİRİLMƏSİ PROQRAMI HAZIRLANIR
Azərbaycanın enerji sisteminin 2010-cu ilədək inkişafı proqramında ölkənin enerji sistemində köklü dəyişikliklər etmək nəzərdə tutulur. Proqrama uyğun olaraq, respublikanın elektrik enerjisinə tələbatını ödəmək üçün qaz-turbin stansiyalarının tikintisinə başlamaq planlaşdırılır. “Azərenerji” Səhmdar Cəmiyyətindən AZƏRTAC-a bildirmişlər ki, bu stansiyalar ekoloji baxımdan daha səmərəli və sərfəlidir. Köhnə qurğuları mərhələ-mərhələ sökmək nəzərdə tutulur.
İndiki stansiyalarda bir kilovat-saat elektrik enerjisi istehsal etmək üçün 600-700 qram yanacaq tələb olunursa, qaz-turbin stansiyalarında bu göstərici 215-220 qram təşkil edir. Bundan əlavə, yeni tipli stansiyalarda atmosferə buraxılan zərərli maddələr 10 dəfə azdır. İnkişaf proqramına uyğun olaraq, “Azərenerji” SC 2003-cü ildə Sumqayıtda 400 meqovat gücündə yeni qaz-turbin stansiyası inşa etməyi, 2004-2005-ci illərdə isə Əlibayramlı DRES-də yeni qurğunu istifadəyə verməyi planlaşdırır. “Azərbaycan” DRES-də 9-cu və 10-cu enerji bloklarının tikintisini başa çatdırmaq və quraşdırmaq da nəzərdə tutulmuşdur.
Nəzərdə tutulan bütün bu tədbirlər 7 min meqavatadək elektrik enerjisi istehsal etməyə imkan verəcəkdir, indi isə bu göstərici 5,3 meqavatdır.
Bölmənin digər xəbərləri
