OMBUDSMAN APARATINDA DƏYİRMİ MASA KEÇİRİLMİŞDİR
İnsan hüquqları üzrə müvəkkil Elmira Süleymanova bildirmişdir ki, ölkəmizin iqtisadi cəhətdən möhkəmlənməsi və əhalinin rifahının yüksəldilməsi istiqamətində atılan mühüm addımlar insan hüquqlarının təmin edilməsi baxımından böyük imkanlar yaratmışdır. O, uşaqların ana südü ilə qidalanmasının zəruriliyini vurğulayaraq qeyd etmişdir ki, son illər süd verən analara müavinətlərin ödənilməsi, əlil uşaqların sosial problemlərinin həlli sahəsində vacib işlər görülür.
YUNİSEF-in Azərbaycandakı nümayəndəliyinin rəhbəri xanım Hana Singer çıxışına müqəddəs Qurandan gətirdiyi “Analar öz uşaqlarına 2 il ərzində süd verməlidirlər” fikri ilə başlamışdır. O bildirmişdir ki, ana südünün tərkibindəki şəkər komponentləri immun çatışmazlığı virusunun körpələrə keçməsinə mane olur. Natiq körpələr üçün süni qidaların keyfiyyətinin aşağı olması, onların lazımi temperatur şəraitində saxlanılmaması, xaricdən idxal edilən qidaların Azərbaycan dilində markalanmaması barədə də danışmışdır.
Milli Məclisin deputatı İlham Məmmədov “Körpə və uşaqların düzgün qidalanmasının qanunvericiliklə müdafiəsi”, Azərbaycan Respublikasının baş pediatrı Nəsib Quliyev “Körpələrin təbii üsulla qidalanması insan sağlamlığının təminatı kimi”, Azad İstehlakçılar Birliyinin sədri Eyyub Hüseynov “Körpə qidalarının satışı və reklamına nəzarət” mövzularında çıxışlar etmişlər.
Natiqlər vurğulamışlar ki, körpələrin və erkən yaşlı uşaqların ana südü ilə qidalanmasının təbliği, süni qida məhsullarının istehsalı, idxalı, reklamı və satışı qanunla tənzimlənir və daim nəzarətdə saxlanılır.
