Ombudsman: Ölkəmizdə hüquqi dövlət quruculuğunun əsas strateji istiqamətləri Ümummilli Liderin adı ilə bağlıdır
Bakı, 12 may, AZƏRTAC
Bu gün təqdim olunan nəşr təkcə bir kitab deyil, müasir Azərbaycan dövlətinin memarı, onun hüquqi inkişaf yolunda və ədliyyə sisteminin formalaşmasında mühüm rolu olan Ümummilli Lider Heydər Əliyevin dövlətçilik irsinin bu sahədə yaratdığı fundamental əsaslara həsr olunmuş dəyərli elmi-hüquqi mənbədir. Kitabın müəllifi uzun illər Azərbaycanın ədliyyə naziri və Məhkəmə-Hüquq Şurasının sədri kimi ölkəmizin hüquq və ədliyyə sisteminin inkişafında mühüm xidmətləri olmuş Fikrət Məmmədov bu əsərdə həm zəngin peşəkar təcrübəsini, həm də dövlətçilik tariximizə əsaslanan dərin hüquqi yanaşmasını əks etdirib.
AZƏRTAC xəbər verir ki, bunu Azərbaycanın insan hüquqları üzrə müvəkkili (ombudsman) Səbinə Əliyeva Hüquq və İnsan Haqları İnstitutunda keçirilən "Heydər Əliyev və Azərbaycan ədliyyəsi" kitabının təqdimat mərasimində çıxış edərkən deyib.
Onun sözlərinə görə, müasir Azərbaycan hüquq sisteminin təşəkkül və inkişaf mərhələlərinə nəzər yetirdikdə aydın şəkildə görünür ki, ölkəmizdə hüquqi dövlət quruculuğunun əsas strateji istiqamətləri və möhkəm dövlətçilik əsasları bilavasitə Ümummilli Lider Heydər Əliyevin adı və fəaliyyəti ilə sıx bağlıdır: "Kitabda Ümummilli Lider Heydər Əliyevin təşəbbüsü və siyasi iradəsi ilə aparılan hüquqi islahatlar geniş şəkildə təhlil edilərək Azərbaycanın sovet hüquq sistemindən uzaqlaşaraq demokratik prinsiplərə, qanunun aliliyinə və dünyəvi dövlətçilik dəyərlərinə əsaslanan müasir hüquqi dövlət modelinə keçidi prosesi detallı şəkildə oxucuların diqqətinə çatdırılıb. Xüsusilə 1996-cı ildə Ulu Öndərin rəhbərliyi ilə yaradılmış Azərbaycan Respublikası Prezidentinin yanında Hüquqi İslahat Komissiyasının fəaliyyəti nəticəsində görülən işlər, hüquqi dövlət quruculuğu prosesi diqqətə çatdırılıb. Belə ki, məhz həmin mərhələdən etibarən qanunvericilik bazasının təkmilləşdirilməsi, yeni məcəllələrin və normativ-hüquqi aktların hazırlanması, məhkəmə və hüquq-mühafizə sisteminin yenidən qurulması, eyni zamanda, cəmiyyətdə hüquq düşüncəsinin və hüquq mədəniyyətinin inkişaf etdirilməsi istiqamətində ardıcıl tədbirlər həyata keçirilib. Bu islahatlar yalnız hüquqi mexanizmlərin yenilənməsi ilə məhdudlaşmayıb, həm də dövlət idarəçiliyində insan hüquqlarının prioritet dəyər kimi qəbul edilməsinə zəmin yaradıb. Nəticə etibarilə, ölkəmizdə insan hüquqlarının müdafiəsinə xidmət edən yeni milli mexanizmlər formalaşıb, hüquqi dövlət quruculuğu daha möhkəm əsaslar üzərində inkişaf etməyə başlayıb. Bu inkişaf xəttinin məntiqi davamı olaraq, 2002-ci ildə Konstitusiyaya edilmiş mütərəqqi dəyişikliklər insan hüquq və azadlıqlarının müdafiəsinin gücləndirilməsi, dövlət institutlarının fəaliyyətinin təkmilləşdirilməsi və Azərbaycanın beynəlxalq hüquqi məkana inteqrasiyasının daha da dərinləşdirilməsi baxımından mühüm əhəmiyyət kəsb edib".
Səbinə Əliyeva deyib ki, “Heydər Əliyev və Azərbaycan ədliyyəsi” kitabı Azərbaycan ədliyyəsinin keçdiyi inkişaf yolunu yalnız tarixi ardıcıllıqla təqdim etmir, həm də bu inkişafın ideya-fəlsəfi mahiyyətini, dövlətçilik düşüncəsi ilə hüquqi islahatlar arasındakı üzvi bağlılığı açır: "Müəllifin təqdim etdiyi yanaşmalar yalnız analitik araşdırmanın nəticəsi deyil, həm də hüquqi islahatların içərisində olmuş, həmin proseslərin məsuliyyətini daşımış peşəkar dövlət xadiminin müşahidə və qənaətləridir. Bu kitabın dəyərini artıran mühüm cəhətlərdən biri də ondan ibarətdir ki, burada Ümummilli Lider Heydər Əliyevin ədliyyə və hüquq islahatları sahəsində fəaliyyəti daha geniş dövlətçilik kontekstində təqdim olunur".
Müxbir - Günel Türksoy
Bölmənin digər xəbərləri
