ORTA MƏKTƏBLƏRDƏ FUTBOL DƏRSLƏRİ TƏDRİS OLUNACAQ
Bakı, 13 oktyabr (AZƏRTAC). AFFA ilə Təhsil Nazirliyi arasındakı əməkdaşlıq müqaviləsi çərçivəsində Badamdar qəsəbəsindəki 239 nömrəli orta məktəbdə “Məktəblərdə futbol dərsi” layihəsinin təqdimatı olmuşdur.
Tədbirdə çıxış edən AFFA-nın birinci vitse-prezidenti Rauf Əliyev, qurumun baş katibi Elxan Məmmədov, Bakı Şəhər Gənclər və İdman Baş İdarəsinin rəisi Raqif Abbasov və 239 saylı məktəbin direktoru Sədaqət Əzimova uşaq və yeniyetmələr arasında sağlam həyat tərzinin təbliği, habelə, futbolun kütləviliyinin artırılması baxımından bu layihənin mühüm əhəmiyyətini bildirmişlər.
AFFA-dan bildirmişlər ki, 239 nömrəli saylı orta məktəbdən başqa, 240 və 269 nömrəli məktəblərdə də futbol dərsləri pilot layihəsi kimi tədris olunacaq. Dərsləri AFFA-nın təyin etdiyi məşqçilər keçirəcəklər.
Bölmənin digər xəbərləri
