Ötən il inflyasiya təzyiqlərinin yumşalmasına təsir edən amillər açıqlanıb
Bakı, 23 may, AZƏRTAC
Ötən il yanvar-dekabr aylarında orta illik inflyasiya 2022-ci ilin yanvar-dekabrına nəzərən 8,8 faiz olub. Təhlillər göstərib ki, baza effektindən əlavə illik inflyasiya xarici və daxili amillərin, o cümlədən həyata keçirilən antiinflyasiya siyasətinin təsirindən azalıb.
AZƏRTAC xəbər verir ki, bu barədə “Azərbaycan Respublikasının 2023-cü il dövlət büdcəsinin icrası” haqqında hesabatda qeyd olunub.
Bildirilib ki, ticarət tərəfdaşları üzrə ortaçəkili inflyasiyanın nisbətən azalması, dünya əmtəə bazarlarında qiymətlərin enməsi, beynəlxalq yükdaşıma xərclərinin pandemiyadan əvvəlki səviyyəyə qayıtması inflyasiyaya azaldıcı təsir edib. Profisitli tədiyə balansı şəraitində valyuta bazarında tarazlığın qorunması, manatın nominal effektiv məzənnəsinin möhkəmlənməsi, həyata keçirilən antiinflyasiya tədbirləri, qəbul edilmiş pul siyasəti qərarları inflyasiya təzyiqlərini yumşaldıb. O cümlədən faiz dəhlizi parametrlərinin makroiqtisadi vəziyyətə uyğun dəyişdirilməsi, pul siyasəti alətlərinin adekvat tətbiqi və makroprudensial tələblərdə edilən dəyişikliklər məcmu tələbin izafi artımını məhdudlaşdırıb.
Bölmənin digər xəbərləri
