Özbəkistanda COVID-19-la bağlı məhdudiyyətlər qüvvədə saxlanılıb
Daşkənd, 13 iyul, АZƏRTAC
Özbəkistanda iyunun 28-dən iyulun 12-dək COVID-19-la bağlı elan edilən məhdudiyyətlər epidemioloji vəziyyət yaxşılaşana qədər qüvvədə saxlanılıb.
AZƏRTAC xəbər verir ki, bu haqda Özbəkistan koronavirusla bağlı Xüsusi Respublika Komissiyası yeni qərar qəbul edib.
Bildirilir ki, bu müddətdə regionlardan Daşkəndə gələn avtobuslar və fərdi minik maşınlarına məhdudiyyətlər qoyulub. Müstəsna hallarda nəqliyyat vasitələrinin paytaxta buraxılmasına icazə verilir.
Məlumatda qeyd olunur ki, diskoteka, karaoke və gecə klubları, kompüter oyunları mərkəzləri, restoran, kafe və çayxanalar 8:00-dan 20:00-dək işləyəcək.
Məscidlərin həyətlərində namaz qılmaq məsləhət görülür.
Xatırladırıq ki, Özbəkistanda sutkada təxminən 500-ə yaxın koronavirusa yoluxma halı qeydə alınır.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
