PAKİSTANDA İSTİVURMADAN 40 ADAM HƏLAK OLMUŞDUR
İTAR-TASS-ın verdiyi xəbərə görə, Pakistan ərazisinin çox hissəsində havaların həddindən artıq isti keçməsi nəticəsində ötən həftə ərzində 40 adam istivurmadan həlak olmuşdur.
Pəncab əyalətində həlak olanların sayı daha çoxdur. Burada havanın hərarəti vaxtaşırı Selsi ilə 49 dərəcəyə çatır. İstidən ilk növbədə uşaqlar və qocalar əziyyət çəkirlər. Meteoroloqlar yaxın həftələrdə havanın hərarətinin aşağı düşəcəyi barədə proqnoz vermir və güman edirlər ki, bürkülü hava iyunun sonu, iyulun əvvəlinədək davam edəcəkdir.
Meteoroloji xidmət idarəsi xəbərdarlıq edir ki, gələn həftə ölkənin cənub hissəsindəki bəzi rayonlarda havanın temperaturu qalxa bilər. Ölkə iqtisadiyyatına dəymiş ziyan barədə hələlik məlumat yoxdur. Yalnız onu bildirirlər ki, iyun ayında havanın isti və quru keçməsi taxıl yığımı üçün əlverişli şərait yaradacaqdır.
Bölmənin digər xəbərləri
