Pakistanda müxalifət partiyasının baş katibi saxlanılıb
Bakı, 10 may, AZƏRTAC
Müxalif “Ədalət naminə hərəkat” partiyasının baş katibi Əsəd Ömər Pakistan Ali Məhkəməsinin binasında saxlanılıb.
AZƏRTAC “Dawn” qəzetinə istinadla xəbər verir ki, Əsəd Ömərin saxlanılma səbəbləri açıqlanmır.
Mayın 9-da Pakistanın sabiq Baş naziri və “Ədalət naminə hərəkat” partiyasının sədri İmran Xan İslamabadda həbs olunub. O, korrupsiyada və həyat yoldaşına məxsus “Əl-Qadir trast” fondu vasitəsilə çirkli pulların yuyulmasında ittiham edilir.
İmran Xanın həbsi Pakistanın iri şəhərlərində, o cümlədən Abottabad, İslamabad, Lahor, Peşavar, Ravalpindi, Sialkot, Feysəlabad və Haripurda kütləvi nümayişlərə səbəb olub. Bəzi regionlarda nümayişçilərlə polis arasında şiddətli toqquşmalar baş verib.
KİV-in məlumatına görə, polis 1,2 mindən çox nümayişçini həbs edib. Peşavarda iğtişaşlar zamanı dörd nəfərin həlak olduğu, onlarla insanın yaralandığı bildirilir.
Xatırladaq ki, İmran Xan 2022-ci ilin aprelində parlamentin aşağı palatasının etimadsızlıq səsverməsi nəticəsində Baş nazir postundan uzaqlaşdırılıb. Onu bu vəzifədə Pakistan Müsəlman Liqasının sədri Şahbaz Şərif əvəzləyib.
Bölmənin digər xəbərləri
