PAYTAXTIN KANALİZASİYA KOLLEKTORUNUN TİKİNTİSİ DAVAM ETDİRİLİR
Avqustun 7-də “Bakıkanalizasiya” istismar idarəsi Rəşid Behbudov küçəsində 460 metr uzunluğunda magistral kanalizasiya xəttinin çəkilişinə başlamışdır. Bu məqsədlə dövlət büdcəsindən 650 milyon manat ayrılmışdır.
İdarədən AZƏRTAC-a bildirmişlər ki, bu işlər Bakıda böyük kanalizasiya kollektorunun tikintisi layihəsi çərçivəsində aparılır və bir ay müddətində başa çatdırılacaqdır.
Tikintisinə hələ 1975-ci ildə başlanmış bu kollektorun inşası maliyyə problemləri ucbatından dayandırılmışdı. Cari ildə Nazirlər Kabineti Rəşid Behbudov, Fətəli xan Xoyski küçələrində və Azadlıq prospektində kanalizasiya kollektorunun tikintisinə bir milyard manat ayırmışdır. Bundan əvvəl Səməd Vurğun küçəsində uzunluğu 1,2 kilometr olan kanalizasiya xətti çəkilmişdir. İşlər bu küçədə yaşayış binaları inşa etmiş tikinti şirkətlərinin gücü və maliyyə vəsaitləri hesabına yerinə yetirilmişdir.
Bölmənin digər xəbərləri
