Pedaqoji Forum: Elmlərin konvergensiyasında riyaziyyatın rolu
Bakı, 28 dekabr, AZƏRTAC
Dekabrın 28-də Azərbaycan Dövlət Pedaqoji Universitetinin (ADPU) himayəsi ilə təşkil edilən Pedaqoji Forumun (PF) VII dinləməsi keçirilib.
ADPU-dan AZƏRTAC-a bildirilib ki, görüşdə Almaniyanın Münxen şəhərində Helmholtz Elmi Tədqiqat Mərkəzində dinamik sistemlər şöbəsinin müdiri vəzifəsində çalışan dünya şöhrətli riyaziyyatçı alim, professor, “Humboldt” mükafatına layiq görülmüş ilk azərbaycanlı Məsud Əfəndiyev “Elmlərin konvergensiyası: Riyaziyyatın burada rolu” mövzusunda məruzə ilə çıxış edib. O qeyd edib ki, XXI əsrin elmi-texnoloji yenilikləri riyaziyyat elmini biologiya, səhiyyə və digər sahələrlə yaxınlaşdırır və əlaqələri genişləndirir. Bu əlaqələr qarşılıqlı şəkildə inkişaf edir, hər iki tərəfə böyük fayda verir. Riyaziyyat elmi artıq öz klassik mahiyyətini itirib. Yeni nəsil riyaziyyatçılar yetişib, yeni baxışlar, yeni modellər yaranıb. Tətbiqi riyaziyyat artıq yox olmaq üzrədir. Riyaziyyat elmi həm də tarix, sosiologiya ilə bağlıdır. Miqrasiya prosesində riyaziyyatın rolu böyükdür. Riyaziyyatçılara isə təkamül modellərini hazırlamaq üçün tarix elmi kömək edir. Riyaziyyat elmi ictimaiyyət qarşısında yeni üfüqlər açır. Qərbdə fundamental və humanitar elmlər bir-birini tamamlayır, vəhdət halında inkişaf edir. Buna görə də fundamental və humanitar elmlərə vəhdətdə yanaşmaq olduqca vacibdir.
Sonra professor Məsud Əfəndiyev iştirakçıların həm mövzu, həm də Qərb təhsil sistemi və qabaqcıl beynəlxalq təcrübə ilə bağlı suallarını cavablandırıb.
Sonda çıxış edən rektor Cəfər Cəfərov vurğulayıb ki, bugünkü görüş və məruzə elmin populyarlaşdırılması, elmi tədqiqatların əməli fəaliyyətə tətbiqi baxımından çox faydalıdır. Universitet mədəniyyət, təhsil məkanıdır. ADPU-nun cəmiyyətdə missiyası tam fərqlidir. Belə görüşlər bizim üçün olduqca vacibdir. Rektor dünya şöhrətli alimə təşəkkür edib və yeni uğurlar arzulayıb.
Tədbirdə Diasporla İş üzrə Dövlət Komitəsinin Məsud Əfəndiyevlə bağlı hazırladığı film nümayiş etdirilib.
Qeyd edək ki, 1991-ci ildən Almaniyada yaşayan Məsud Əfəndiyev bu ölkənin müxtəlif ali məktəblərində, o cümlədən Münxen, Ştutqart, Berlin universitetlərində çalışıb. 2005-ci ildə Yaponiyanın nüfuzlu “Japan Society for the Promotion of Science - JSPS” təşkilatının mükafatına layiq görülüb. Məsud Əfəndiyev postsovet məkanında dünyanın 6 aparıcı elmi jurnalının redaksiya heyətinin üzvü olan yeganə riyaziyyatçı alimdir.
Bölmənin digər xəbərləri
