PEKİNDƏ OLİMPİYA OYUNLARI BAŞA ÇATMIŞDIR
AZƏRTAC xəbər verir ki, avqustun 24-də Pekindəki “Quş yuvası” milli stadionunda XXIX yay Olimpiya oyunlarının təntənəli bağlanış mərasimi keçirilmişdir.
Pekin vaxtı ilə saat 20.00-da başlayan mərasimdə əvvəlcə Çinin dövlət himni səslənmişdir. Olimpiadanın bağlanış mərasimi gözlənildiyi kimi, rəngarəng bayrama çevrilmiş və oyunları əks etdirən fraqmentlərin nümayişi ilə başlanmışdır.
Çin artistləri milli mahnılar və rəqslər ifa etmiş, milli mifologiyanı və tarixi miniatürləri əks etdirən süjetlər nümayiş olunmuşdur.
Rəngarəng mərasim başa çatdıqdan sonra stadionda bayraqdarlar peyda olmuşlar. Olimpiadanın açılış mərasimindən fərqli olaraq hər bir ölkə öz bayrağı ilə Çin əlifbasındakı ardıcıllığa uyğun olaraq yox, idmançılar meydana birlikdə qaçaraq daxil olmuş və bununla da bütün iştirakçıların həmrəyliyini nümayiş etdirmişlər. Bayraqdarlar isə bu nidmançıların qarşısında gedirdilər.
Yarımsaat davam edən teatrlaşdırılmış şoudan sonra Olimpiya stadionuna bazar günü başa çatmış marafon qaçışının qalibləri və mükafatçıları daxil olmuşlar.
Qızıl medala keniyalı Semuel Kamau Vanjiru layiq görülmüş, marokkolu Smuel Kamau Marokko gümüş, Həbəşistanlı Seqay Kebede isə bürünc medalları qazanmışlar. Mükafatların təqdimetmə mərasimində Beynəlxalq Olimpiya komitəsinin prezidenti Jak Roqqe iştirak etmişdir.
Bağlanış mərasimində Azərbaycan bayrağını boks üzrə yarışların üçüncü mükafatçısı Şahin İmranov aparırdı.
XXIX yay Olimpiya oyunları BOK sədri Jak Roqqenin çıxışından sonra rəsmi olaraq bağlı elan edilmişdir. Öz çıxışında Roqqe Pekin Olimpiadasının təşkilində əməyi olan bütün insanlara-təşkilat komitəsinin üzvlərindən başlamış “öz aşkarlığı və xeyirxahlığı ilə seçilən” könüllülərə kimi, hamıya minnətdarlığını bildirmişdir. “Bu şəhərin sakinləri üçün nəhəng irs yaratmış Çinin hökumətinə və nümayəndələrinə böyük təşəkkürümüzü bildiririk”,- deyə Roqqe bildirmişdir.
Oyunlar sülh və qardaşlıq abhavasında keçmişdir, deyən BOK-un sədri qeyd etmişdir ki, atletlər öz çıxışları, sevincləri və xoşbəxt gözyaşları ilə bizə ürəyimizin dərinliklərinə qədər təsir etdilər. “Bu oyunlar heç zaman unudulmayacaqdır, xəyallarımızın oyunlarına çevriləcəkdir”, -deyə sonda Roqqe bildirmişdir.
Bundan sonra olmpiya bayrağı 2012-ci il London Olimpiadasının təşkilatçılarına təhvil verilmişdir. “Pekin-2008” Olimpiadasının təşkilat Komitəsinin üzvləri bayrağı ingiltərəli nümayəndələrə təhvil vermişlər. Bundan sonra Olimpiya stadionunda gələn yay Olimpiadasının paytaxtı olacaq London haqqında təqdimat keçirilmişdir.
Mərasimə son nöqtə Olimpiya bayrağının endirilməsi ilə qoyulmuşdur ki, bu da Çinin paytaxtında oyunların başa çatdığını bildirmişdir. Bayraq olimpiya himnini sədaları altında endirilmiş və sonra onunla stadion boyunca şərəf dairəsi vurulmuşdur. Olimpiya məşəli söndürülmüşdür.
Pekin oyunlarında 204 ölkənin olimpiya idmançıları iştirak etmişdir. Olimpiadanın 16 günü ərzində 302 dəst medal oynanılmışdır. Azərbaycan ümumi komanda hesabında 1 qızıl, 2 gümüş və 4 bürünc medalla 39-cu yeri tutmuşdur. 1996-cı ilin Atlanta Olimpiadasında bizim cəmi 1 gümüş, 2000-ci ilin Sidney Olimpiadasında 2 qızıl və 1 bürünc, 2004-cü ilin Afina oyunlarında isə 1 qızıl və 4 bürünc medalımız olmuşdu. Pekin Olimpiadasında bizim idmançılar daha yaxşı çıxış edərək rekord miqdarda medal qazanmışlar.
Medalların sayına görə isə son Olimpiada Azərbaycan tarixində ən uğurlusudur. Bu göstərciyə görə biz Çində 27-ci yerdəyik.
Cədvəldə 39-cu yerdə dayanan Azərbaycan postsovet ölkələri arasında 6-cı yeri tutmuşdur. Özbəkistan (1-2-3), Latviya (1-1-1), Estoniya (1-1-0), Litva (0-2-3), Qirğizstan (0-1-1), Tacikstan (0-1-1), Ermənistan (0-0-6) və Moldova (0-0-1) kimi ölkələr bizdən arxada qalmışdır. Yalnız Türkmənistan heç bir medal əldə edə bilməmişdir.
Azərbaycan Avropa ölkələri arasında 20-ci, islam ölkələri arasında isə 3-cü olmuşdur.
Olimpiadanı 51 qızıl, 21 gümüş və 28 bürünc medalla Çinin yığma komandası udmuşdur. İkinci yeri ABŞ (36-38-36) komandası tutsa da medalların sayına görə bu ölkə 1-cidir. Ondan sonra Çin (100) gəlir. Mükafatlar 87 ölkənin idmançıları tərəfindən qazanılmış, 55 ölkə isə olimpiya çempionu olmaq şərəfinə nail olmuşdur.
Bölmənin digər xəbərləri
