PEKİNƏ VƏSİQƏ QAZANMAQLA AZƏRBAYCANIN İDMAN TARİXİNƏ YENİ BİR SƏHİFƏ YAZACAĞIQ
Bu sözləri Azərbaycan Otüstü Xokkey Federasiyasının prezidenti Fazil Məmmədov aprelin 12-dən 20-dək Bakıda qadınlardan ibarət otüstü xokkey komandaları arasında keçirilən beynəlxalq turnirlə bağlı AZƏRTAC-a müsahibəsində bildirmişdir. 2008-ci il Pekin Yay Olimpiadasına lisenziya xarakterli bu turnirdə 6 ölkənin - Azərbaycan, Ukrayna, Belarus, İspaniya, Keniya və Çilinin milli komandaları mübarizə aparacaqlar.
- Bakıda növbəti beynəlxalq turnir keçirilir. Azərbaycan millisinin turnirə hazırlığı barədə nə deyərdiniz?
- Əvvəlcə bu cür mötəbər yarışın Bakıda keçirilməsinə etimad göstərdiyinə görə Beynəlxalq Xokkey Federasiyasına, xüsusilə prezident Els van Breda Vriesmana minnətdarlığımı bildirmək istəyirəm.
Son 4 ildə qadın otüstü xokkeyçilərin 4 beynəlxalq turnirinə ev sahibliyi etmişik və təşkilatçılıq sahəsində müəyyən təcrübəyə malikik. Dünya və Avropa federasiyalarının rəsmiləri Bakıda yarışların yüksək səviyyədə təşkilini dəfələrlə vurğulamışlar. Bütün bunlar dövlətimizin başçısı İlham Əliyevin rəhbərlik etdiyi Milli Olimpiya Komitəsinin idmana qayğısı nəticəsində mümkün olmuşdur.
Bu gün idmanın bir çox sahələrində, o cümlədən kollektiv növlərində, xüsusilə də otüstü xokkeyin inkişafında mühüm irəliləyişlər vardır. Qadın xokkeyçilərdən ibarət milli komandamız Avropanın 8 ən güclüsü sırasına çıxmış və ayrı-ayrı turnirlərdə əldə etdiyi nəticələr sayəsində dünya reytinq cədvəlində 15-ci yerdə qərarlaşmışdır. Bütün bu uğurlar nəticəsində qadın xokkeyçilərimiz planetimizin 12 ən güclü milli komandası sırasında Pekin Yay Olimpiya Oyunlarda iştirak etmək iddiasındadırlar.
Komandamızın bu məsul yarışa ciddi hazırlaşması üçün Gənclər və İdman Nazirliyi, habelə MOK-la birgə bütün mövcud imkanlardan istifadə etmişik.
Ötən ilin sentyabrından xokkeyçilərimiz Bakıda məşqlərə başlamışlar. Dekabr ayında Hindistanda təlim-məşq toplanışı zamanı Malayziya, İtaliya və Hindistan yığmaları ilə, bir ay sonra isə Omanın Masqad şəhərində Hollandiya, Hindistan və Oman xokkeyçiləri ilə sınaq oyunları keçirilmişdir. Bu il martın 20-dən Malayziya və İtaliya komandaları Bakıya gələrək, xokkeyçilərimizlə daha bir neçə yoxlama oyunlarında iştirak etmişlər. Bütün bunların komandamızın oyun təcrübəsinin artmasına müsbət təsiri şübhəsizdir.
O ki qaldı, turnirin təşkilati məsələlərinə, zənnimcə, hazırlıq işləri yüksək səviyyədədir. Turnirlə bağlı yaradılan təşkilat komitəsi komanda üzvlərinin, tamaşaçıların, rəsmi qonaqların əhval-ruhiyyəsinin yüksək olması üçün bütün lazımi tədbirləri görmüşdür. Otüstü xokkey kompleksində təmir-bərpa işləri aparılmış, lazımı avadanlıq alınmışdır. Bir sözlə, Bakı turniri yüksək səviyyədə keçiriləcəkdir.
- Bu turnirin idmanımız üçün əhəmiyyəti böyükdür. İlk dəfədir ki, Azərbaycanın Olimpiya oyunlarında idmanın komanda növü üzrə lisenziya qazanmaq üçün yaxşı şansı vardır. İdmançı qızlarımızın qarşısında hansı vəzifələri qoymusunuz?
- Birmənalı olaraq qeyd etmək istəyirəm ki, 2001-ci ildən - bu federasiyaya rəhbərlik edəndən istəyimiz xokkeyçilərimizin dünya və Avropa çempionatlarında, eləcə də Olimpiya oyunlarında uğurlu çıxış etmələri olmuşdur. Bu gün qadınlardan ibarət milli komandamız bu vəzifənin öhdəsindən gəlməyə çox yaxındır. Yəqin ki, yadınızdadır, 2005-ci ildə qadın xokkeyçilərdən təşkil olunan “Atasport” klubu Hollandiyada Avropa Çempionlar Kuboku yarışlarında güclülər dəstəsində debütünü finala çıxmaqla qeyd etmişdir. O zaman həlledici oyunda yerli “Hertogenboş” komandasına uduzan xokkeyçilərimiz gümüş medala sahib olmuşlar. Bu nəticəni isə ölkəmizin komandalı idman növlərindən heç biri göstərə bilməyib. Elə bu dəfə də Pekin Olimpiadasına vəsiqə qazanmaqla Azərbaycanın idman tarixinə yeni səhifə yazmaq fikrindəyik. Ümidvaram ki, yüksək hazırlığın müqabilində bu arzularımız reallaşacaqdır. Bu, bizim oyunçuların təxirəsalınmaz vəzifəsidir.
- Komandamızın heyəti ilə bağlı problemlər varmı? Hansı ölkələrin yığma komandalarını Pekin Olimpiadasına lisenziya uğrunda mübarizədə xokkeyçi qızlarımızın əsas rəqibləri sayırsınız?
- Əlbəttə, turnirə hazırlıq mərhələsində komandamızın üzvləri ilə daha sıx ünsiyyətdə olduğumuzdan deyə bilərəm ki, ciddi problem yoxdur. O ki qaldı, turnirdəki əsas rəqibimizə, Bakıya gələn komandaların hər birinin iddiası, arzusu vardır. Hər bir komanda Pekin Yay Olimpiya Oyunlarında iştirak etmək niyyətindədir. İspaniya xokkeyçiləri dünya reytinq cədvəlində 5-ci yeri tutduğuna görə digərlərindən fərqlənirlər. Amma ötən il İngiltərənin Mançester şəhərində keçirilən Avropa çempionatında bizim xokkeyçilər ispanlarla oyunda 2:0 hesabı ilə irəlidə olsalar da, sonradan arxayınçılıq üzündən rəqib komandanın hesabı bərabərləşdirməsinə imkan vermişlər. İnanıram ki, həmin qüsur bu dəfə təkrarlanmayacaqdır.
- Belə beynəlxalq yarışların keçirilməsi digər vacib məqsədə - Azərbaycanı, onun nailiyyətlərini təbliğ etmək məqsədinə də xidmət edir. Qonaqlarımızı hansı mədəni proqram gözləyir?
- Bu cür yarışlarda, adətən, iştirakçılar və rəsmi qonaqlar turnirin keçirildiyi ölkə və şəhər barədə hərtərəfli məlumat toplamağa çalışırlar. Odur ki, biz də İçərişəhər, Qız qalası, eləcə də son illər daha da gözəlləşən Bakımızın bir çox görməli yerlərinə gəzintilər planlaşdırmışıq. Bu kütləvi-mədəni tədbirləri turnir zamanı nəzərdə tutulan 3 istirahət günündə həyata keçirəcəyik. Əcnəbi qonaqlarımıza Azərbaycan həqiqətlərini çatdırmağa çalışacağıq.
- Siz həm də Güləş Federasiyasının prezidentisiniz. Finlandiyada başa çatmış Avropa çempionatında idmançılarımızın nəticələrindən razısınızmı?
-Başqa illər olsaydı razı qalardım. Amma Olimpiya ili olduğuna görə pəhləvanlarımızın daha bir neçə lisenziya qazanmalarına ümid bəsləyirdim. Eyni zamanda, iki Avropa çempionumuzun olması, 1 gümüş və 4 bürünc mükafatın qazanılması böyük nəticədir. Elə buna görə də yarışdan sonra fərqlənən idmançılarla görüşüb onları təbrik etdik və uğurlu çıxışlarının müqabilində Federasiyamız adından mükafatlandırdıq. Qarşıda güləşçilərimizin daha 2 lisenziya turniri vardır və əminəm ki, Pekinə gedəcək pəhləvanların sayı daha çox olacaqdır.
######
Bölmənin digər xəbərləri
