DÜNYA
Populyar aktyor Miloş Bikoviç ilk dəfə ata olub
![Populyar aktyor Miloş Bikoviç ilk dəfə ata olub](/files/2024/1/1200x630/17048946953170464855_1200x630.jpg)
Bakı, 10 yanvar, AZƏRTAC
Yanvarın 9-da məşhur aktyor, o cümlədən, eyniadlı serialda Müslüm Maqomayev rolunun ifaçısı kimi tanınan Miloş Bikoviç öz sosial şəbəkə hesablarında gülməli, çox güman ki, özünün müəllifi olduğu və üç nəfərdən - ana, ata və körpədən ibarət ailə şəkli paylaşaraq, xoş və əlamətdar hadisə barədə məlumat verib. Lakin körpənin cinsi, adı və doğum tarixi barədə aktyor heç nə yazmayıb.
AZƏRTAC xarici KİV-ə istinadla xəbər verir ki, o öz Çernoqoriyadan olan hüquqşünas xanımının hamiləliyi barədə 2023-cü ilin sentyabrında məlumat verib. Yayımladığı videoda aktyor öz sevincini ictimaiyyətlə paylaşıb: “Tezliklə valideyn adını qazanacağımız üçün xoşbəxtik. Bu, yəqin ki, bizim həyatımızda ən vacib məqamdır. Biz indiyə qədər bunu açıqlamaq niyyətində olmasaq da, paparazzilər bizi elə bir vəziyyətdə qoyublar ki, başqa seçimimiz qalmayıb. Hər kəsə xoş sözlərə və təbriklərə görə təşəkkürümüzü bildiririk və KİV və jurnalistlərdən qərarımıza və şəxsi həyatımızın toxunulmazlığına hörmət etmələrini xahiş edirik. Əgər bu mövzuda məlumat vermək niyyətində olsaq, mütləq media ilə əlaqə yaradacağıq”.
M.Bikoviç övladının dünyaya gəlməsini çoxdan arzulayıb, hətta verdiyi müsahibələrdə dəfələrlə həyatının uşaqlarsız boş olduğunu bəyan edib.
“Uşaq sahibi olmaq arzusu məni cəlb edir. Özümlə bağlı çox böyük - nail olmaq, sübuta yetirmək, doğrultmaq, birinci yerə çıxmaq kimi iddialarım yoxdur. Öz işimlə məşğul olmağa davam etmək, daha da təkmilləşmək istəyirəm, ancaq uşaqlarımla bir yerdə ola bilmək üçün layihələrimdən imtina etməyə belə hazıram. Məqsədim özümə ev almaq və ailə qurmaq üçün münasib qız tapa bilməkdir”, - deyə aktyor İvana ilə tanışlıqdan əvvəlki müsahibələrinin birində bildirib.
Cütlüyün birlikdə olması ilə bağlı ilk xəbər 2021-ci ildə “Cənub küləyi 2. Qayıdış” filminin premyerası zamanı yayılıb. Lakin aktyor öz şəxsi həyatını ictimailəşdirməyi sevmir. Miloşun işi az olanda, cütlük birlikdə tətilə çıxır. Dekabrın sonunda isə onun film həmkarı İvan Oxlobıstin istəmədən onların gizli şəkildə evləndikləri ilə bağlı mediaya açıqlama verib.