Praqa pandemiyaya qədər planlaşdırıldığından 2 dəfə az aviasərnişin qəbul edəcək
Praqa, 9 iyun, AZƏRTAC
Vatslav Havel adına beynəlxalq aeroportun illik sərnişin axını bu il təqribən 8-10 milyon nəfər təşkil edəcək. Bu, əvvəl planlaşdırıldığından iki dəfə aşağıdır.
AZƏRTAC xəbər verir ki, bu barədə Çexiyanın hava nəqliyyatı üzrə milli agentliyinin mətbuat üçün yayımlanan məlumatında bildirilir.
Hələ ötən ilin sonunda aeroport bu il 19 milyon sərnişin qəbul etməyi nəzərdə tuturdu.
Digər tərəfdən Amerika və Kanada operatorları elan ediblər ki, bu il onlar Çexiya paytaxtına birbaşa transatlantik reyslər həyata keçirməyəcəklər. Bu isə o deməkdir ki, Filadelfiya, Çikaqo və Toronto kimi istiqamətlər yalnız növbəti ildə əlçatan olacaq.
Proqnozlara görə, Avropa İttifaqı məkanındakı aeroportlar ilin sonunadək az səyahətçi qəbul edəcək. Sağlamlıqla bağlı problemlər və iqtisadi səbəblərə görə səyahətçilərin sayının dərhal deyil, tədricən artacağı gözlənilir.
Bir neçə aviaşirkət uçuşları iyunun 17-dən bərpa edəcəyini planlaşdırması barədə artıq xəbər verib.
Pərvanə Qarayeva
AZƏRTAC-ın xüsusi müxbiri
Praqa
Bölmənin digər xəbərləri
