PREZİDENT SEÇKİLƏRİ ƏRƏFƏSİNDƏ AĞSUDA QURUCULUQ İŞLƏRİ GENİŞ VÜSƏT ALIR, ƏHALİNİN RİFAH HALI YÜKSƏLİR
AZƏRTAC xəbər verir ki, bu gün Ağsu ictimaiyyəti qarşıdan gələn prezident seçkilərinə ciddi hazırlaşır, demokratiya və şəffaflıq şəraitində öz konstitusiya hüququndan istifadə edəcəyi günü səbirsizliklə gözləyir. Mühüm siyasi kampaniya ərəfəsində Azərbaycanın hər yerində olduğu kimi, Ağsuda da heç zaman görünməyən bir inkişaf qeydə alınır.
Rayon İcra Hakimiyyətinin başçısı Ənvər Seyidəliyev deyir ki, indi təkcə Ağsuda deyil, ümumiyyətlə, respublikanın hər yerində qazanılan nailiyyətlər Prezident İlham Əliyevin yeritdiyi uğurlu daxili siyasətin nəticəsidir. Bu siyasət əhalinin rifah halının yüksəlməsinə təminat verir. Məsələn, rayon üzrə adambaşına düşən gəlir bu ilin birinci yarısında 2003-cü ildəki 33 manatdan 112 manata çatmışdır. Dövlətin qayğısı ağsuluların qurub-yaratmaq həvəsini birəbeş artırmışdır. Hazırda təkcə rayon mərkəzində onlarla yerdə tikinti, təmir, bərpa, yenidənqurma, abadlıq işləri gedir. Bu işlərin geniş miqyas almasında rayon büdcəsinin vəsaiti, eləcə də müxtəlif dövlət qurumlarının ayırmaları ilə yanaşı, iş adamlarının, özəl bölmə nümayəndələrinin qoyduğu sərmayə də mühüm rol oynayır.
Ağsu ənənəvi kənd təsərrüfatı rayonudur. Son illərin göstəriciləri sübut edir ki, aparılan islahatlar öz səmərəsini vermişdir. Yeri gəlmişkən, bu ilin məhsulu üçün əvvəlki ildəkindən 3004 hektar çox sahədə taxil əkilmişdi. Taxılçılar 2007-ci ildəki rekordu (80,1 min ton) təzələmək əzmindədirlər. Hələlik 27 min 961 hektar sahə biçilmiş, 81,6 min ton məhsul götürülmüşdür.
Regionların sosial-iqtisadi inkişafı Dövlət Proqramının aqrar sahəyə dair hissəsi də böyük ruh yüksəkliyi ilə reallaşdırılır. “Aqrotexservis” müəssisəsinin maddi-texniki təchizatı yaxşılaşdırılmış, Kalva kəndi ərazisində 16 hektar yeni üzümlük salınmışdır. Fermer və sahibkarlarımız ölkə Prezidentinin “Kənd təsərrüfatı məhsulları istehsalçılarına dövlət dəstəyi haqqında” sərəncamında nəzərdə tutulmuş güzəştlərdən yüksək səviyyədə istifadə edirlər.
Təbii ki, əkinçiliklə yanaşı, heyvandarlıq və quşçuluq sahələrinin inkişafına da böyük qayğı göstərilir.
Rayonda sahibkarlığın inkişafı da diqqət mərkəzindədir. Bunun sayəsində istehsalın həcmi artmış, xarici bazara keyfiyyətli məhsul çıxarılması üçün uğurlu addımlar atılmışdır. Bu işdə "Ağsu-Konserv-3" Açıq Tipli Səhmdar Cəmiyyətinin, "Ağsu Konserv A-EM", “Miri Qrand” MMC, “Büllur” MMC və “Mehman” MMC-nin xidmətləri böyükdür. Bu qurumlar meyvə şirələri, şərab məhsulları və alkoqollu içkilərin istehsalı sahəsində səmərəli fəaliyyət göstərirlər. Ötən müddət ərzində yeni emal xətləri quraşdırılmış, sexlər tikilmiş, məhsulların çeşidi artırılmışdır. Ağsu şəhərində çörək sexləri, abadlıq işlərində istifadə edilən bardür və tamet istehsal edən sexlər, Kalva kəndində “Pərvanə” MMC və onlarla ticarət, iaşə, məişət və servis xidməti obyektlərinin, plastik qapı-pəncərə hazırlayan sexin, onlarla digər obyektin tikintisi ya başa çatmış, ya da başa çatmaq üzrədir.
Rayon mərkəzində və kəndlərdə abadlıq, quruculuq, tikinti, sosial obyektlərin təmiri və bərpası sahəsində görülən işlər daha böyük miqyas almışdır. Şəhərin girişində ulu öndər Heydər Əliyevin adını daşıyan seyrangahın və qəhrəmanlar parkının salınması, mərkəzdə Heydər Əliyev muzeyinin, şərq tərəfdə isə dairəvi yolun çəkilişi, mədəniyyət sarayının yenidən qurulması, mərkəzi ərazilərdə mövcud ticarət, iaşə, kommunal-məişət, servis və xidmət obyektlərinin dam örtüyünün müasir memarlıq üslubunda yenidən qurulması, müxtəlif təyinatlı inzibati binaların tikilməsi bugünkü Ağsunun reallıqlarıdır. Xatırladım ki, şəhərin və kəndlərin sosial-iqtisadi inkişafında, abadlıq-quruculuq işlərində bələdiyyə orqanları da fəal iştirak edirlər.
Rayon əhalisinə elektrik enerjisi və təbii qazın verilməsi, paylaşdırılması, enerji haqlarının toplanılmasının yaxşılaşdırılması sahəsində təxirəsalınmaz tədbirlər görülmüşdür.
Yeni istehsal sahələrinin yaradılması, təbiidir ki, yeni iş yerlərinin açılması ilə müşayiət olunur. Bu ilin 6 ayında rayonda 388 yeni iş yeri açılmışdır. Regionların sosial-iqtisadi inkişafı Dövlət Proqramı qəbul ediləndən bəri isə 5 min 786 yeni iş yeri açılmışdır. Bunun 3 min 097-i daimidir.
Ənvər Seyidəliyev bu ilin ən böyük hadisəsinə - oktyabrda keçiriləcək prezident seçkilərinə də münasibətini bildirdi. Vurğuladı ki, ağsulu seçicilər bu mühüm siyasi kampaniyada fəal iştirak edəcək, ölkəni ağ günə çıxarmış Heydər Əliyev siyasətinə yekdilliklə səs verəcəklər.
Bölmənin digər xəbərləri
