Professor: Zəfər Günü Azərbaycanın dövlət müstəqilliyinin, suverenliyinin, gücünün və qüdrətinin rəmzidir
Bakı, 2 noyabr, AZƏRTAC
Zəfər Günü Azərbaycanın dövlət müstəqilliyinin, suverenliyinin, gücünün və qüdrətinin rəmzidir.
Bu fikri AZƏRTAC-a açıqlamasında Azərbaycan Dövlət Pedaqoji Universitetinin Analitik və üzvi kimya kafedrasının müdiri kimya elmləri doktoru, professor Əli Zalov bildirib.
“Şuşa azad olunduqdan sonra bəziləri elə fikirləşirdi ki, beynəlxalq aləm ermənilərin yaşadığı Azərbaycan ərazisində hər hansı əməliyyat keçirməyə və bu ərazilər üzərində ölkəmizin nəzarətini bərpa etməyə imkan verməyəcək. Həmin dövrdə ABŞ və Qərb ölkələrinin tutduğu mövqe, verilən bəyanatlar belə proqnozlar üçün ciddi əsaslar yaradırdı. Vətən müharibəsindən ilyarım sonra Azərbaycan vətəndaşları Ermənistan silahlı qüvvələrinin qalıqlarının təxribatlarına qarşı Laçın yolu üzərində dinc etiraz aksiyasına başladı. Bu zaman bəzi qonşu və Qərb ölkələrinin verdikləri qərəzli bəyanatlar Azərbaycana qarşı təzyiq cəhdi idi”, - deyə o, əlavə edib.
“ABŞ, Avropa İttifaqı, Fransa kimi ölkələr işğal prosesinin əbədi qalmasında həmişə maraqlı olub. Bu ölkələr öz ənənələrinə sadiq qalaraq ATƏT-in Minsk qrupunu yenidən diriltmək, uzun-uzadı mənasız danışıqlar prosesinə start vermək istəyirdilər. Deyilənlər Azərbaycana qarşı təsir və təzyiq mexanizmlərini saxlamağa xidmət edirdi. Vəziyyətin belə qalması “parçala və hökm sür” siyasətinin məntiqi davamı olardı. Qərb bununla göstərmək istəyirdi ki, guya ermənilər Azərbaycanda yaşaya bilməzlər. Buna görə də onların ayrılmasını və müstəqil dövlət kimi formalaşmasın təmin edən hüquqi prosedur işə salınmalıdır.
Ona görə də Azərbaycana sanksiyalar tətbiq ediləcəyi ilə bağlı hədələr, şəxsən Prezident İlham Əliyevə qarşı daim təzyiqlər olurdu. BMT, Avropa Parlamenti, Avropa Şurası kimi beynəlxalq mexanizmlərin potensialından yararlanmaq cəhdləri Qərb dairələrinin öz niyyətlərini praktiki müstəviyə keçirdiklərini aydın göstərirdi. Məqsəd Prezident İlham Əliyevi planlarından çəkindirmək və Azərbaycanın öz ərazisi üzərində tam suverenliyini bərpa etməsinə imkan verməmək idi. Bütün bunlara baxmayaraq, məqsədimizə nail olduq. Başladığı işi yarımçıq qoymayan, “nəyi, nə zaman və necə” etməyi yaxşı bilən Ali Bal Komandanın məntiqli siyasəti nəticəsində suverenliyimiz və ərazi bütövlüyümüz tam bərpa olundu. Qələbədən keçən üç il ərzində həyata keçirilən siyasət və görülən işlər prosesin davamı oldu və 2023-cü il sentyabrın 20-də öz məntiqi sonluğuna çatdı. Bütün təzyiqlərə və hədələrə baxmayaraq, həmişə gələcəyə baxan, onilliklər sonranı düşünən və bütün planlarını dövlətimizin strateji məqsədlərinə uyğun quran Prezident İlham Əliyev prinsipiallıq və qəti iradə nümayiş etdirərək Xankəndidə Azərbaycanın Dövlət Bayrağının dalğalanmasına nail oldu”, - deyə professor vurğulayıb.
Alim bildirib ki, İlham Əliyev xalqa güvənərək, ondan güc alaraq bütün dünyanı haqlı olduğumuza inandırdı: “Bu məsələdə maneə olan güclərin müqavimətini sındırdı və böyük ustalıqla qurduğu mürəkkəb sxemin hər bir detalını incəliklə, zərgər dəqiqliyi ilə işləyərək tarixi ədaləti bərpa etdi və üzərinə götürdüyü tarixi missiyanı başa çatdırdı. İndi inamla deyə bilərik ki, İlham Əliyev Milli Lider xüsusiyyətlərinin və keyfiyyətinin daşıyıcısıdır. 2023-cü il sentyabrın 20-də bir sutka ərzində erməni terrorçuların təslim olmağa məcbur edilməsi, oktyabrın 15-də isə Xankəndidə Azərbaycanın Dövlət Bayrağının ucaldılması öz tarixi əhəmiyyətinə görə 44 günlük müharibə və 8 Noyabr - Zəfər Gününə bərabər növbəti parlaq Qələbə oldu. Bu mənada 2023-cü il sentyabrın 20-də əldə olunan Qələbə əhəmiyyətinə görə Zəfər Gününə bərabər və onu tamamlayan tarixi hadisədir.
İnanıram ki, tariximizin müxtəlif mərhələlərində xalqımızı və dövlətimizi qələbədən-qələbəyə aparmış Cavanşir, Eldəniz, Cahan Pəhləvan, Şah İsmayıl kimi hökmdarların və bütün həyatını Azərbaycan xalqına həsr etmiş və ölkəmizin ərazi bütövlüyünün bərpa olunması ən böyük arzusu olan Ümummilli Lider Heydər Əliyevin ruhu şaddır”.
Bölmənin digər xəbərləri
