QAFQAZ MÜSƏLMANLARI İDARƏSİ İFTAR SÜFRƏSİ AÇMIŞDIR
Noyabrın 30-da Qafqaz Müsəlmanları İdarəsinin sədri şeyxülislam hacı Allahşükür Paşazadə öz iqamətgahında iftar süfrəsi açmışdır.
İftar süfrəsinə dəvət olunmuş qonaqları - Milli Məclisin sədri Murtuz Ələsgərovu, baş nazirin birinci müavini Abbas Abbasovu, Azərbaycan Respublikası Dövlət Neft Şirkətinin vitse-prezidenti, Milli Olimpiya Komitəsinin prezidenti, Milli Məclisin deputatı İlham Əliyevi, Bakıda fəaliyyət göstərən dini qurumların başçılarını, diplomatik korpusun nümayəndələrini, nazirləri və komitə sədrlərini səmimi salamlayan hacı Allahşükür Paşazadə xalqımızın müqəddəs saydığı Ramazan bayramının keçirilməsi, müsəlmanların dini ayinlərini sərbəst şəkildə icra etmələri üçün müstəqil Azərbaycanda hər cür şərait yaradıldığını vurğuladı, ölkəmizdə vicdan azadlığının, milli-mənəvi dəyərlərin qorunması işinə dövlətimizin başçısı Heydər Əliyevin qayğısını xüsusi qeyd etdi.
Sonra Azərbaycanda fəaliyyət göstərən digər dini qurumların başçıları çıxış edərək, Ramazan bayramı ərəfəsində bütün müsəlmanları təbrik etdilər.
Xarici işlər naziri Vilayət Quliyev iftar süfrəsinə dəvətə görə diplomatik korpusun nümayəndələri adından minnətdarlığını bildirdi.
Bölmənin digər xəbərləri
