QAFQAZ XALQLARINA VƏ HÖKUMƏTLƏRİNƏ MÜRAİCƏT
Əziz qafqazlılar, qardaş və bacılar!
Biz, “Qafqazda sülh naminə əməkdaşlıq” mövzusunda Tbilisi beynəlxalq konfransının iştirakçıları sizə müraciət edirik. Biz Qafqaz regionundakı çoxsaylı xalqları və dinləri təmsil edərək, sülhün və həmrəyliyin bərqərar olması işində öz borcumuzu yekdilliklə başa düşürük, çünki sülhün və həmrəyliyin bərqərar edilməsi, dini mənsubiyyətindən asılı olmayaraq, bütün xoş məramli insanların arzusudur.
Biz, Qafqaz regionunun pravoslavlığı, islamı, iudaizmi, erməni kilsəsini, katolikliyi, lüteranlığı və baptizmi təmsil edən liderləri, habelə siyasətçiləri, elm və mədəniyyət xadimləri üzərimizə düşən yüksək məsuliyyəti dərk edərək, həmvətənlərimizin zəkasına və qəlbinə ülvi duyğular aşılamağı, onları hər bir xalqın və bütün Qafqazın rifahına cavab verən dinc yanaşı yaşama yoluna yönəltməyi özümüzə borc bilirik.
Biz Qafqazın xoşbəxt gələcəyi naminə göstərdiyimiz səyləri dəstəkləyən Azərbaycan Respublikasının Prezidenti zati-aliləri cənab Heydər Əliyevə və Gürcüstan Prezidenti zati-aliləri cənab Eduard Şevardnadzeyə dərin minnətdarlığımızı bildiririk.
Biz regionun ən mühüm problemlərini müzakirə edərək, dərin narahatlıq hissi ilə vurğuladıq ki, bu gün xalqlarımız ən çox etnik və millətlərarası münaqişələrdən, separatizmdən və ksenofobiyadan, yadlaşma və qarşılıqlı ədavətdən əziyyət çəkirlər. Xarici və daxili səbəblərdən yaranmış Ermənistan-Azərbaycan, abxaz-gürcü, osetin-inquş, Çeçenistan münaqişələri və digər münaqişələr uzun illərdən bəri Qafqazda həyata kədər gətirən, milyonlarla insanı dərd və müsibətlərə düçar edən, regionda təbii proseslərin inkişafına və tərəqqiyə əngəl törədən başlıca amil olaraq qalır.
Biz hesab edirik ki, millətlərarası və dinlərarası qarşılıqlı fəaliyyət, mehriban qonşuluq, ərazi bütövlüyünün saxlanması Qafqazın xoşbəxt gələcəyinə doğru aparan yeganə yoldur. Hər hansı başqa bir yol fəlakətli uçuruma, qanlı ədavətlərə, müqəddəs nemət olan həyatın məhvinə doğru aparır.
Biz müxtəlif dinlərə etiqad edərək, yekdilliklə bu fikirdəyik ki, möhkəm sülh hər bir insana bərabər hüquqlar bəxş edən sülhdür. Sabitlik xə xalqlar arasında həmrəylik silah gücünə deyil, ancaq zəkanın gücü ilə bərqərar edilməlidir.
Biz Sivilizasiyaların Qarşılıqlı Fəaliyyəti üzrə Beynəlxalq Mərkəz (qeyri-hökumət təşkilatı) təsis etməyi qərara almışıq. Onun strukturunu, fəaliyyət məqsədlərini və səlahiyyətlərini müəyyənləşdirmək üçün əlaqələndirici təşəbbüs qrupu yaradılmışdır, Qrupun tərkibinə dini liderlər, beynəlxalq təşkilatların və qeyri-hökumət təşkilatlarının nümayəndələri, müstəqil ekspertlər daxil olacaqlar. Beynəlxalq mərkəz Qafqaz regionunda baş verən halların monitorinqini keçirmək imkanına malik olacaqdır ki, bu da cari prosesləri daha şəffaf edəcək və hadisələrin qiymətləndirilməsində birtərəfliliyi və qərəzliliyi aradan qaldıracaqdır.
Ümidvarıq ki, bu Mərkəzin fəaliyyətinə xas olacaq qarşılıqlı anlaşma və razılıq ruhu xalqlarımızın qəlbinə yol tapacaq, insanların şüurunu biganəlikdən təmizləyəcək və xalqlara qarşılıqlı etimad təlqin edəcəkdir.
İnanırıq ki, dövlət rəhbərləri ölkələr arasındakı çətinlikləri və ziddiyyətləri səbrlə dəf edəcək və qarşılıqlı surətdə məqbul qərarlara nail olacaqlar. Zənnimizcə, Qafqazda regional münaqişələrin aradan qaldırılması işində beynəlxalq təşkilatlar da mühüm rol oynaya bilərlər. Qafqaz ölkələrinin onlarla əməkdaşlıqda əldə etdikləri təcrübəni yüksək qiymətləndirərək, beynəlxalq təşkilatları daha fəal və qətiyyətli olmağa çağırırıq. Biz isə onlarla əməkdaşlığa və birgə layihələrin həyata keçirilməsinə hazır olduğumuzu bildiririk.
Böyük çətinliklərə baxmayaraq, qəlbimizdə belə bir ümid var ki, XX1 əsrdə xalqlarımız dinc və firavan şəraitdə yaşayacaq, ümumbəşər ailəsində layiqli yer tutacaqlar.
İstər Qafqaz regionunda, istərsə də bütün dünyada sülhə və həmrəyliyə nail olmağa aparan yol çətin və keşməkeşlidir, böyük səylər və fədakarlıq tələb edir. Qafqazlıların xoşbəxt gələcəyə bəslədikləri ümidlərin gerçəkləşməsi naminə biz, öz tərəfimizdən, bilik və təcrübəmizi əsirgəməyəcəyik.
“Qafqazda sülh naminə əməkdaşlıq”
mövzusunda Tbilisi beynəlxalq
konfransının iştirakçıları
Bölmənin digər xəbərləri
