QARA DƏNİZ ÖLKƏLƏRİ PAYTAXTLARININ BAŞ MƏCLİSİ ÖZ İŞİNƏ BAŞLADI
Aprelin 29-da Bakı Şəhər İcra Hakimiyyətinin binasında Qara dəniz ölkələri paytaxtları Assosiasiyasının 3-çü Baş Məclisi öz işinə başladı. Qara Dəniz İqtisadi Əməkdaşlıq Təşkilatı (QİƏT) Parlament Assambleyasının təşəbbüsü ilə çağırılmış assambleyanın işində Qara dəniz hövzəsindəki 10 ölkənin merləri, prefektləri və bələdiyyə nümayəndələri iştirak edirlər. İki gün davam edəcək Bakı assambleyasında paytaxt şəhərlərində həyat səviyyəsinin yüksəldilməsində yerli hakimiyyət orqanlarının rolunun gücləndirilməsi məsələlərinin müzakirə edilməsi nəzərdə tutulmuşdur.
Bakı şəhərinin meri Hacıbala Abutalıbov qonaqları salamlayaraq dedi ki, Qara dəniz hövzəsi ölkələri paytaxtlarının hakimiyyət orqanları arasında əməkdaşlığın inkişafına, birgə layihələrin həyata keçirilməsinə, xalqların yaxınlaşmasına yönəldilmiş belə mötəbər görüşün Bakıda keçirilməsi Azərbaycan Prezidenti Heydər Əliyevin daxili və xarici siyasəti, ölkədə yaranmış ictimai-siyasi sabitlik sayəsində mümkün olmuşdur. Hacıbala Abutalıbov qeyd etdi ki, assambleyanın iştirakçıları şəhərlə tanışlıq zamanı Bakının müasir, Avropa səviyyəli infrastruktura malik olduğunu öz gözləri ilə görəcəklər.
Assambleyanın açılışında çıxış edən Milli Məclis sədrinin birinci müavini Arif Rəhimzadə Azərbaycan Prezidenti Heydər Əliyevin salamlarını iştirakçılara çatdırdı və ölkə parlamenti adından bu forumun işinə uğurlar arzuladı. O, Bakının timsalında paytaxt şəhərlərində həyat səviyyəsinin yüksəlməsində yerli orqanların rolundun danışaraq, bunu da əlavə etdi ki, erməni separatçılarının Dağlıq Qarabağda başladıqları münaqişədən sonra Azərbaycan paytaxtı bir sıra çətinliklərlə qarşılaşmışdır. Hazırda Bakıda Ermənistan silahlı birləşmələri tərəfindən Qarabağdan və ətraf rayonlardan qovulmuş xeyli sayda qaçqın yaşayır.
Arif Rəhimzadə dedi ki, hökumət yoxsulluğun azaldılması proqramı çərçivəsində Azərbaycanın bütün regionlarında yeni iş yerləri açılmasına, istehsal müəssisələrinin ölkənin bütün ərazisində səmərəli və bərabər şəkildə yerləşdirilməsinə yönəldilmiş bir sıra layihələr işləyib hazırlayır. O, ümidvar olduğunu bildirdi ki, birgə səylər sayəsində və beynəlxaq maliyyə qurumlarının, o cümlədən Qara dəniz Ticarət və İnkişaf Bankının köməyi ilə bu layihələr uğurla həyata keçiriləcəkdir. Arif Rəhimzadə iştirakçı ölkələri sosial və ekoloji problemlərin həlli məsələlərində əməkdaşlığı gücləndirməyə də çağırdı. O dedi ki, Azərbaycan və onun paytaxtı beynəlxalq qlobal layihələrin - İpək yolunun bərpa edilməsi, Xəzər dənizinin karbohidrogen ehtiyatlarının nəql olunması layihələrinin həyata keçirilməsi mərkəzlərindən biridir.
Assambleyanın açılışında QİƏT PA-nın vitse-prezidenti, Azərbaycan nümayəndə heyətinin başçısı Yaşar Əliyev, bu təşkilatın baş katibi Corc Petriku da çıxış etdilər.
Açılış mərasimində baş nazirin müavini Abid Şərifov iştirak edirdi.
X X X
X X X
Assambleyanın iştirakçıları həmin gün Şəhidlər xiyabanını ziyarət edərək, ölkəmizin azadlığı, ərazi bütövlüyü və suverenliyi uğrunda canlarından keçmiş cəsur Azərbaycan övladlarının xatirəsini andılar. Qonaqlar şəhidlərin məzarları üstünə gül-çiçək düzdülər, “Əbədi məşəl” abidəsinin önünə əklil qoydular. Sonra Qara dəniz hövzəsindəki 10 ölkənin merləri, prefektləri, bələdiyyə nümayəndələri Şəhidlər xiyabanının fəxri qonaqları kitabına ürək sözlərini yazdılar.
Bakı Şəhər İcra Hakimiyyətinin başçısı Hacıbala Abutalıbov qonaqlara şəhərin panoramı, görməli yerləri barədə məlumat verdi.
Foto Namiq Məmmədovundur
Bölmənin digər xəbərləri
