MƏDƏNİYYƏT
“QARABAĞ” ADLI BİBLİOQRAFİYA NƏŞR OLUNMUŞDUR
Azərbaycan Milli Elmlər Akademiyasının Füzuli adına Əlyazmalar İnstitutundan AZƏRTAC-ın müxbirinə bildirmişlər ki, institut bu günlərdə “Qarabağ” adlı biblioqrafiya nəşr etdirmişdir. “Şuşa” nəşriyyatında işıq üzü görmüş bu kitabda Azərbaycanın Qarabağ bölgəsi haqqında 2001-ci ilə qədər yazılmış əsərlərin böyük bir hissəsi barədə informasiyalar toplanmışdır.
Qarabağın tarixi, mədəniyyəti, iqtisadiyyatı barədə xeyli elmi tədqiqat işləri yazılmış, kitablar nəşr olunmuşdur. Bu tədqiqatlar Ermənistanın Azərbaycan ərazilərinə iddialarının əsassız olduğunu sübut edir.
Yeni nəşr elmin müxtəlif sahələri ilə məşğul olan və Qarabağ haqqında dəqiq məlumat almaq istəyən geniş oxucu kütləsi üçün nəzərdə tutulmuşdur.
Biblioqrafiyanın tərtibçisi tarix elmləri namizədi Aydın Xəlilov, elmi redaktoru Məmməd Adilovdur.