QARŞILIQLI İQTİSADİ ƏLAQƏLƏRİN İNKİŞAFINDA YENİ MƏRHƏLƏ
Heydər Babayev Prezident Ro Mu Hyunun səfərinə ölkəmizdə böyük önəm verildiyini və onun Azərbaycan Prezidenti İlham Əliyevlə görüşünün və aparılan danışıqların, qarşılıqlı əlaqələrin inkişafına böyük təkan verəcəyini vurğulamışdır.
Nazir respublikamızda aparılan iqtisadi islahatlar nəticəsində ciddi irəliləyişlərə nail olunduğunu və bu dinamikanın uğurla davam etdirildiyini bildirmişdir. O demişdir ki, ölkə iqtisadiyyatının lokomotivi olan neft-qaz sektoru ilə yanaşı, qeyri-neft sektorunun inkişafının sürətləndirilməsi prioritet istiqamətdir. Bazar iqtisadiyyatı prinsiplərinin formalaşması, sahibkarlığın inkişafına diqqətin daha da artırılması bu sahədə əhəmiyyətli irəliləyişlərə imkan yaratmış, ümumi daxili məhsulda özəl bölmənin payı 76 faizi ötmüşdür. Hazırda Koreya Respublikasının bir sıra şirkətləri Azərbaycanda elektron-məişət cihazlarının, avtomobillərin satışı və onlara texniki xidmət sahələrində səmərəli fəaliyyət göstərirlər. Neft kimyası, yol tikintisi, kənd təsərrüfatı, bank, sığorta və s. sahələrdə də geniş əməkdaşlıq imkanları vardır.
Nazir bir sıra sahələrdə Koreyanın təcrübəsindən yararlanmağın əhəmiyyətini vurğulamış və Dünya Ticarət Təşkilatına üzvlük məsələsində bu ölkənin Azərbaycanı dəstəkləyəcəyinə ümidvar olduğunu bildirmişdir.
Görüşdə Azərbaycanda tarazlı iqtisadi inkişafın təmin edilməsi məqsədi ilə həyata keçirilən dövlət proqramları barədə də məlumat verilmiş və bu çərçivədəki layihələrdə Koreya Respublikasının iş adamlarının iştirakının mümükünlüyü vurğulanmışdır.
Çon Se Qyun Koreya Respublikası Prezidentinin Bakıya səfərinin hər iki ölkə üçün böyük əhəmiyyət daşıdığını söyləyərək, ölkəmizdə həyata keçirilən iqtisadi islahatları maraqla izlədiyini, qazanılmış uğurlardan məmnunluğunu söyləmiş, əlaqələrin genişlənməsində mövcud imkanları yüksək qiymətləndirmişdir.
Görüşün sonunda Azərbaycanda İxracın və İnvestisiyaların Təşviqi Fondu (AZPROMO) və Koreya İxracın və İnvestisiyaların Təşviqi Agentliyi (KOTRA) arasında qarşılıqlı əməkdaşlıq haqqında anlaşma memorandumu” imzalanmışdır. Sənədi AZPROMO-nun prezidenti Emil Məcidov və KOTRA-nın prezidenti Honq Ki Xua imzalamışlar. Memorandum hər iki ölkənin iş adamları arasında tərəfdaşlıq münasibətlərinin inkişafını nəzərdə tutur.
Bölmənin digər xəbərləri
