QAX TAXILÇILARI GƏLƏN İLİN MÖVSÜMÜNƏ CİDDİ HAZIRLAŞIRLAR
Qax Rayon İcra Hakimiyyətindən AZƏRTAC-a bildirmişlər ki, rayonun taxılçılıq təsərrüfatlarında 2009-cu ilin məhsulu üçün payızlıq taxıl səpini mütəşəkkil davam edir.
Bu il rayonda taxıl əkini sahələrinin 13 min hektara çatdırılacağı proqnozlaşdırılır ki, bu da ötən mövsümlə müqayisədə 2-3 min hektar çoxdur. Mövsümün əvvəlindən indiyədək təsərrüfatlarda 9 min hektara yaxın sahədə keyfiyyətli şum qaldırılmış, 6 min hektara toxum səpilmişdir. Fermerlər səpin zamanı buğda əkinlərinə daha çox üstünlük verirlər. Bunun nəticəsidir ki, əkin sahələrinin 70 faizdən çoxunu buğda təşkil edir.
Növbəti illərdə təsərrüfatların toxuma olan tələbatını tam ödəmək məqsədi ilə “Aqrolizinq” ASC-nin xətti ilə bu il rayona 30 ton yüksək reproduksiyalı toxum gətirilərək, səpin üçün tinglik və toxumçuluq müəssisəsinə verilmişdir. Cəmiyyətin xətti ilə cari ildə rayona 128 ton azot gübrəsi də gətirilmiş və fermerlərə paylanmışdır. Bundan əlavə, “Aqrolizinq” ASC rayonun taxılçılıq təsərrüfatları üçün 168 ton fosfor gübrəsi də ayırmışdır.
Bölmənin digər xəbərləri
