QAXDA POLİATLON ÇOXNÖVÇÜLÜYÜ ÜZRƏ ZONA YARIŞLARI KEÇİRİLMİŞDİR
Qax, 13 oktyabr (AZƏRTAC). Qax şəhərində “Vətənin müdafiəsinə hazıram” poliatlon çoxnövçülüyü üzrə respublika çempionatının zona mərhələsinin yarışları keçirilmişdir. Yarışlarda Balakən, Zaqatala, Qax, Şəki, Oğuz, Qəbələ və İsmayıllı rayonlarını təmsil edən çağırışaqədər və çağırış yaşlı gənclərdən təşkil olunmuş 7 komanda mübarizə aparmışdır.
Qax Rayon Gənclər və İdman İdarəsinin rəisi Əlövsət Bayramov bildirmişdir ki, nazirliyin tədbirlər planına uyğun olaraq keçirilən bu yarışlar çağırışaqədər və çağırış yaşlı gəncləri hərbi xidmətə hazırlamaq, onlarda vətənpərvərlik hislərini daha da yüksəltmək məqsədi daşıyır.
Şəhər stadionunda keçirilən zona birinciliyində komandalar 100 metr məsafəyə qaçma, turnikdə dartınma və qumbara atma yarışlarında öz qüvvələrini sınamışlar. Zona yarışında ilk 3 yeri tutan Qax, İsmayıllı və Balakən komandaları respublika çempionatının oktyabrın 23-27-də Qusar şəhərində keçiriləcək final mərhələsinə vəsiqə qazanmışlar.
Bölmənin digər xəbərləri
