Qazi İntiqam Cumayev: Düşmən müharibə qanunlarını pozaraq tibbi yardım maşınlarına da atəş açırdı
Zaqatala, 3 noyabr, Mustafa Dadaşov, AZƏRTAC
Müzəffər Azərbaycan Ordusunun Şanlı Zəfəri ilə başa çatan Vətən müharibəsinin ilk günlərindən böyük ruh yüksəkliyi ilə könüllü olaraq cəbhəyə yollanan minlərlə gəncimiz, həmçinin hərbi xidmətdə olan əsgər və zabitlərimiz torpaqlarımızın işğaldan azad edilməsi uğrunda başlanan 44 günlük savaşda şərəfli döyüş yolu keçib, qəhrəmanlıq göstəriblər. Bu döyüşlərdə şəhidlərimiz də olub, yaralananlar da.
Müharibənin od-alovundan keçən, qanlı döyüşlərdə ağır yaralanaraq sağlamlığını itirən qəhrəmanlarımızdan biri də Zaqatala rayonunun Qımır kəndindən olan qazi, II qrup müharibə əlili İntiqam Cumayevdir.
AZƏRTAC-ın bölgə müxbiri Vətən müharibəsi qazisi ilə görüşüb, onun döyüş yolu ilə maraqlanıb.
İntiqam Cumayev 1986-cı ildə Zaqatala rayonunun Qımır kəndində anadan olub. 2004-2006-cı illərdə həqiqi hərbi xidmətdə olub. 2009-cu ildən isə müddətdən artıq həqiqi hərbi xidmət hərbi qulluqçusu kimi Daxili Qoşunlarda xidmətə başlayıb. 2013-cü ilədək Daxili Qoşunların Zaqataladakı, 2013-2016-cı illərdə isə Lənkərandakı hərbi hissələrində xidmət edib.
Qazi xidmət illərini belə xatırlayır: “2016-cı ilin Aprel döyüşləri zamanı Lənkəranda xidmət edirdim. Aprel döyüşlərinin iştirakçısı, Talış yüksəkliklərinin alınmasında qəhrəmanlıq göstərərək şəhid olmuş Pəncəli Teymurovun dəfnində iştirak edərkən qəti qərara gəldim ki, hərbi hissəmi dəyişməliyəm, Milli Orduda, döyüş bölgəsində xidmət etməliyəm. Çox istəyirdim ki, Xüsusi Təyinatlı Qoşunlarda xidmət edim, alınmadı. Yaşım 30-dan yuxarı olduğu üçün məni xüsusi təyinatlılara qəbul etmədilər. Qırx dörd günlük Vətən müharibəsi başlananadək Milli Ordunun hərbi hissəsində Ballıqaya-Ağcakənd istiqamətində xidmət etdim”.
İntiqam Cumayev 44 günlük müharibə zamanı Suqovuşanın, Talış kəndinin azad olunması uğrunda gedən döyüşlərə qatılıb. O, 2022-ci ildə Fərrux dağı yüksəkliyi istiqamətində aparılan antiterror əməliyyatlarında iştirak edib. 2023-cü ildə sentyabrın 19-da başlanan antiterror əməliyyatları zamanı Xüsusi Təyinatlı Qüvvələrin tərkibində yaradılan ilk komando briqadasının döyüş əməliyyatı taborunda döyüş dəstəyi təxliyə qrupunda olub.
Qazi yaralandığı döyüşü belə xatırlayır: “Xəbər gəldi ki, Ağdamın Papravənd kəndi istiqamətində gedən döyüşlər zamanı əməliyyat taborumuzun iki zabiti ağır yaralanıb. Onları arxaya təxliyə etməli idik. Yaralıları nar bağının yanından götürdüm və hərbi tibbi yardım maşınına çatdırdım. Onları maşına yerləşdirdim. Müharibənin öz qanunları var, tibbi yardım maşınını vurmaq olmaz. Təəssüf ki, mənfur düşmənlərimiz heç vaxt bu qanunu gözləməyiblər. Düşmən tərəfindən atılan artilleriya mərmisi nəticəsində maşınımız partladıldı. Maşında mənimlə bərabər Elmin Qarayev, Tapdıq Bayramov, Mikayıl, tibb maşınını sürücüsü Balakəndən Sərxan Köklərov da var idi. Onların hamısı şəhid oldu. Mən ayağımdan, qolumdan, gözümdən yaralandım. Bütün bədənim, başım qəlpə yaraları idi. Sonra təxliyə qrupu bizi götürməyə gəlib. Məni silkələyiblər, görüblər ki, xırıldayıram, hələ nəfəsim gəlir”.
Qazi söhbətinə davam edərək deyib: “Vurulandan bir saat sonra bizi çıxarmağa gəliblər. Təxliyə qrupunun komandiri, Goranboydan olan baş leytenant məni 500 metrdən çox çiynində aparıb. İnanmırdım ki, yaşayaram. Arada ayılırdım, hər şey kino lenti kimi gəlirdi gözümün önünə. Tanrı mənə dostlarımın yanında şəhid olmağı qismət etmədi. Həkimimiz, cəsur döyüşçü Elnur Hacıyevin sayəsində sağ qaldım. Hazırda sol qolum ümumiyyətlə iş qabiliyyətini itirib”.
Qeyd edək ki, Vətən müharibəsində göstərdiyi şücaətə görə İntiqam Cumayev “Hərbi xidmətdə fərqlənməyə görə” və “Suqovuşanın azad olunmasına görə” medalları ilə təltif olunub.
Bölmənin digər xəbərləri
