Qəbələdə güllə atıcılığı üzrə birincilik keçirilib
Qəbələ, 18 oktyabr, Mustafa Dadaşov, AZƏRTAC
Qəbələ Atıcılıq Klubunda 18 Oktyabr - Müstəqilliyin Bərpası Gününə həsr olunmuş yeniyetmə və gənclər arasında pnevmatik tüfəngdən güllə atıcılığı üzrə rayon birinciliyi keçirilib. Şəki-Zaqatala Regional Gənclər və İdman İdarəsinin təşkilatçılığı, rayon Təhsil Sektorunun və Qəbələ Atıcılıq Klubunun dəstəyi ilə keçirilən yarışda rayonun 28 tam orta məktəbindən 90-dək oğlan və qız idmançı mübarizə aparıb.
Regional Gənclər və İdman İdarəsindən AZƏRTAC-ın bölgə müxbirinə bildirilib ki, yarışın açılış mərasimində idarənin rəisi Ramiz Mahmudov və Qəbələ Atıcılıq Klubunun meneceri Anar Məcnunov çıxış edərək, ölkəmizdə idmana və idmançılara göstərilən dövlət qayğısından danışıb, yarışın məqsədi barədə məlumat veriblər.
Sonra yarışlara start verilib. İştirakçılar komanda və şəxsi birincilikdə mübarizə aparıblar. Yekun nəticələrə əsasən, Qəbələ şəhər 3 nömrəli tam orta məktəbin komandası birinci yeri tutaraq kuboka sahib olub. Uludaş kənd və şəhər 1 nömrəli tam orta məktəblərin komandaları müvafiq olaraq ikinci və üçüncü yerləri tutublar. Şəxsi yarışlarda da ilk yerləri tutan idmançılar diplomlarla mükafatlandırılıblar.
Bölmənin digər xəbərləri
